घानाय् थीमजिउ जूपिं मिस्तय्त खुसि छीत प्रतिबन्ध

घानाय् स्कुलया मिस्तय्त थीमजिउ जुयाच्वंगु इलय् छपु खुसि छीत प्रतिबन्ध तयाबिउगु दु । आफिन खुसिइ दयेका तःगु तां वनेत हे प्रतिबन्ध तयाबिउगु खः । थ्व खुसियात कयाः धार्मिक मान्यता दुगु कारणं वंग मंगलवाःनिसें थीमजिउ जूपिं मिस्तय्सं तां वनेत पनाबिउगु खः ।
थ्व प्रतिबन्धं यानाः मस्तय् अधिकारयात कयाः ज्या यानाच्वंपिं अधिकारकर्मीत तसकं तम्वयाच्वंगु दु । विशेषत उगु हे ताँ जुयाः स्कुलया मस्तय् स्कुल वनेमाःगु जूगुलिं अधिकारकर्मीत तंचाःगु खः । थ्व प्रतिबन्धया कारणं थीमजिउ जूपिं विद्यार्थीत स्कूलय् हे वनेमखनीगु जूगु दु ।
युनेस्कोया कथं थ्व क्षेत्रया झिम्हय् छम्ह छात्रा थीमजिउ जुइगु कारणं हे स्कूल वनेगुपाखें बञ्चित जुयाच्वंगु दु । विश्वबैंकया कतं घानाया १.१५ करोड मिस्त सरसफाइ सुविधापाखें बञ्चित जुयाच्वंगु दु ।
युनिसेफया मेन्स्ट्रुअल हाइजीन एम्बेसडर शमीमा मुस्लिम अलहसनं आफिन खुसिया ताँयात कयाः जारी याःगु प्रतिबन्ध शिक्षा अधिकारया उल्लंघन खः धयादीगु दु ।

– एजेन्सी