ने. सं. ११४६ तछलाथ्व षष्ठी - सिथि नखः कुमार षष्ठी

जनगायक भृगुराम श्रेष्ठया एकल सांगीतिक ज्याझ्वः क्वचाल

येँ – जनगायक भृगुराम श्रेष्ठया ८५ दँया ज्याथःगु बैंशय् वयां वय्कःया न्हापांगु एकल सांगीतिक ज्याझ्वः जुल । जनगायक श्रेष्ठया लोकंह्वाःगु छपु म्येँ ‘माया रे रत्न’या नामं हे थनया राष्ट्रिय नाचघरय् जूगु ज्याझ्वलय् जनगायक श्रेष्ठं थःगु अतिकं लोकंह्वाःगु भाषा, मतिना, धार्मिक यानाः थीथी झिंनिपु म्येँ न्ह्यब्वयादीगु खः ।जयश्री संगीत समाजया ग्वसालय् जूगु ज्याझ्वः प्रतिनिधिसभाया दुजः रामवीर मानन्धरं त्वाः देवाय् मत च्याकाः उलेज्या यानादीगु खः । ज्याझ्वलय् नवासें वय्कलं जनगायक श्रेष्ठया सम्मानय् जूगु उगु ज्याझ्वलय् इतिहासय् लुँ आखलं च्वयेबहजूगु धासें च्वमि व म्येँ हालामि स्रष्टाया सम्मान थुकथंया परम्परा छगू बांलाःगु शुरुवात खः धासें राज्य पक्षपाखें नं थज्याःगु ज्याझ्वः यायेगु व स्रष्टाया सम्मान वा वय्कःपिंत छुं व्यवस्था याकेगु निंतिं थम्हं पहल यायेगु प्रतिवद्धता प्वंकादिल ।

समाजया सचिव दीपेन्द्ररत्न वज्राचार्यया लसकुसपाखें न्ह्याःगु ज्याझ्वलय् ‘झी कलाकार’ उपाधिपाखें सम्मानित जुयादीम्ह नांजाःम्ह म्येँ हालामि श्रेष्ठं दकलय् न्हापां उगु इलय् सरकारया भाषिक दमनया नीति विरुद्ध भाषिक जागरण थनेकथंया म्येँ ‘झीगु भाषा मंत धाःसा गय् थ्व नेपाः झीगु जुइ, थःगु देय् परदेश जुइकाः म्वायेगु हे नं सीगु जुइ….’ पाखें सांगीतिक वातावरणयात क्वाकेगु ज्या यानादिल । थुगु म्येँ न्ह्यब्वयेगु इलय् हल छगुलिं स्तब्ध व शून्य जूगु खः । वयां लिपा वय्कलं निपुगु म्येँकथं बौद्ध धर्मया ज्ञानमाला म्येँ ‘राग मि नुगलय् गुनुहुँ गुनुहुँ न्वयेकाः …..’ धाःगु न्ह्यब्वयादिल । स्वपुगु म्येँ कथं मतिनाया म्येँ ‘यः मैं ख्यालं ख्यालं ययेकां आःला नी हे जुया बिल ….’ न्ह्यब्वयादीगु खःसा प्यपुगु म्येँ कथं अय्लाःया म्येँ हालादिल । ‘अय्लाः नवः झन् व सिबें नवः जि …..’ गुगु म्येँ झीसं नांजाःम्ह म्येँ हालामि सत्यनारायण राजभण्डारीया सलय् न्यना वयाच्वनागु खःसा थुगु म्येँ दकलय् न्हापांखुसी जनगायक श्रेष्ठं हालादीगु जुयाच्वन ।

वयां लिपा ज्याझ्वःया न्हापांगु ब्वय् थप निपु म्येँ न्ह्यब्वयेगु झ्वलय् वय्कलं मतिना सम्बन्धी म्येँ ‘द्यःयात सिन्हाय्स्वां, मय्जुयात ह्याउँगु स्वां, भाजुयात गुनकेरास्वां’ व ‘उखे नं मथ्यं थुखे नं मथ्यं बीचय् लात रे राजनमाया ….’ धाःगु म्येँ न्ह्यब्वयादीगु खः । थुगु म्येँ झीसं ‘वारी मथ्यं पारी मथ्यं’ बोलय् न्यना वयाच्वनागु खःसा थुकिया ‘ओरिजिनल भर्सन’या म्येँ ज्याझ्वलय् न्ह्यब्वःगु खः ।न्हापांगु ब्वय् खुपु म्येँ न्ह्यब्वये धुंकाः पलखया निंतिं दिपाः कायेगु ज्या जुल धाःसा थ्व झ्वलय् हलया वातावरणयात छझाःया निंतिं न्ह्यइपुकेगु ज्या जुल । वयां लिपा निगूगु ब्व शुरु जुल । थुगु ब्वय् जनगायक श्रेष्ठं ‘असं त्वाःया दबू कुनय् मियातःगु ग्वाः …’, ‘न्ह्याक्व दुसां मगाःगु ध्यबा गज्याःगु’ राजमतिया लसतय् ‘कारे यःमाः धया बिउ….’ ‘झ्यालय् च्वनाः नक्कल यानाः …..’, धाःगु म्येँ न्ह्यब्वयादीगु खःसा ज्याझ्वःया दकलय् लिपांगु म्येँ कथं वय्कःया अतिकं लोकंह्वाःगु ‘माया रे रतन, जि नं छंके माया …..’ म्येँ न्ह्यब्वसें ज्याझ्वः क्वचायेकूगु खः ।

औपरिचक ज्याझ्वः न्ह्याये न्ह्यः विशेष पाहांकथं झायादीम्ह सांसद मानन्धरलिसें विशिष्ट पाहांपिं जनकवि दुर्गालाल श्रेष्ठ, भाषिक न्ह्यलुवा पद्मरत्न तुलाधर, नेवाः देय् दबूया नायः नरेश ताम्रााकार, पुलांम्ह राज्यमन्त्री तीर्थराम डंगोल, ज्यापु महागुथिया नायः राजभाई जकःमि, वरिष्ठ म्येँ हालामि प्रेमध्वज प्रधान, येँ मनपा १८ वडाअध्यक्ष न्हुछेकाजी महर्जन लगायतयात खादां क्वखायेकाः सम्मान याःगु खः ।निगू ब्वय् ब्वथलातःगु ज्याझ्वःया न्हापांगु ब्व क्वचायेकाः रामकृष्ण खड्गीं च्वयादीगु व वय्कःया हे निर्देशनय्ु रजनी खड्गी, रुपेन्द्र श्रेष्ठ ‘थक्वाः’ व राजन शाहीया अभिनय दुगु ‘यमराजया ममः’ नांया ख्यलः न्ह्यब्वःगु खः । ख्यालः धुनेवं ज्याझ्वःया मुख्य आकर्षण जनगायक भृगुराम श्रेष्ठयात ज्याझ्वःया ग्वसाः खलः जयश्री संगीत समाजपाखें दोसल्लां न्ययेकाः हनापौ देछानाः सम्मान याःगु खः ।

वय्कःयात समाजया संस्थापक नापं संरक्षक वरिष्ठ तबला वादक रविनलाल श्रेष्ठं दोसल्लां न्ययेकादीगु खःसा समाजया नायः लक्ष्मीप्रसाद डंगोलं स्वांमाः क्वखायेकादीगु खः । अथे हे ज्याझ्वःया विशेष पाहां सांसद मानन्धरं हनापौ लःल्हानादीगु खः ।
ज्याझ्वलय् न्ह्यब्वःगु ज्वःम्येँय् नेपालभाषाया नांजाःम्ह म्येँ हालामि रत्नशोभा महर्जनं साथ बियादीगु ज्याझ्वलय् रविनलाल श्रेष्ठ, नवीन श्रेष्ठ, ज्योति घिमिरे, भूपेन्द्र वज्राचार्य, दिनेश रेग्मी, बाबुराजा महर्जन, रमेश डंगोल, महेश प्रजापति, विनय महर्जन, कुलप्रसाद महर्जन लगायतं गितार, बासुरि, की–बोर्ड, धोलक, मादल, खिं, तबला आदि वाद्यवादनय् ग्वाहालि यानादीगु खः ।शास्त्रीय व लोक संगीतया ख्यलय् क्रियाशील समाजपाखें दँय्दसं राष्ट्रिय व अन्तर्राष्ट्रियस्तरय् ख्याति प्राप्त स्रष्टा व सर्जकयात ब्वनाः उकथंया ज्याझ्वः यायेगु याना वयाच्वंगु ल्याखं थुगुसी न्हापांखुसी नेपाःया सुं कलाकारयात सम्मान यायेकथं याःगु थ्व न्हापांगु ज्याझ्वः खः ।