भारतय् निगू खोपयात स्वीकृति

एजेन्सी – भारतय् कोभिड १९ सम्बन्धी निगू खोपयात आपतकालिन अवस्थाय् छ्यलेगु कथं स्वीकृति बिउगुदु । थ्व निगू खोप मध्ये छगू अक्सफोर्ड विश्वविद्यालयं एस्ट्रोजेनिक कम्पनी लिसे जानाः दयेकूगु ‘कोभिसिल्ड’ व भारतय् हे विकसित याःगु ‘कोभ्याक्सिन’ खः । कोभ्याक्सिनं भारतया बायोटेक कम्पनीं इन्डियन काउन्सिल अफ मेडिकल रिसर्चलिसे जानाः दयेकूगु खः ।

भारतया नियामक निकाय ड्रग्स कन्ट्रोलर जनरल अफ इन्डिया (डिसीजीआई)नं कोभिसिल्ड खोप ७०.४२ प्रतिशत तक प्रभाविकारी जूगु खँ धाःगु दु । अथेहे कोभ्याक्सिन नं सुरक्षित दुगु व थुकिं प्रतिरक्षा क्षमता बल्लाकेत ग्वाहालि याइगुखँ धाःगु दु । डिसीजिआइया निर्णययात कयाः छगू ट्विट यासें भारतीय प्रधानमन्त्री नरेन्द्र मोदी निर्णायक पलाः जूगु खँ धयादीगु दु । वय्कलं ‘बधाई भारत’ धासें थ्व खोपं देय्यात कोरोना मुक्त यायेत ग्वाहालि याइगु विश्वास प्वंकादीगु दु ।

भारतं थ्व दँय् जक स्वीद्वः भारतीयतय्त खोप बीगु योजना दयेकाच्वंगु दु । कोभिशिल्ड व कोभ्याक्सिन निगुलिं खोप निगू चरणय् बीमाः । थ्व खोपयात २ निसें ८ डिग्री सेल्सियस तापक्रमय् तयेमाः । अक्सफोर्ड व एस्ट्रोजनं विकास याःगु खोप भारतय् स्थानीयरुपं सेरम इन्स्टिच्यूटं उत्पादन यानाच्वंगु दु। थ्व इन्स्टिच्यूटं लछिया न्याद्वः मात्रा खोप उत्पादन यायेगु खँ धाःगु दु । भारतय् कैडिला हेल्थकेयरं विकास याःगु मेगु छगू खोपयात नं स्वंगूगु चरणया परिक्षणया निंतिं स्वीकृति बीधुंकूगु दु ।

सम्बन्धित बुखँ

LEAVE YOUR COMMENTS