लकडाउन चालेधुंकाः संक्रमण अप्वः मजूगु दावी

येँ (नेपालभाषा टाइम्स) – स्वनिगलय् आइतवाः थप च्याम्हेसिके कोरोना संक्रमण पुष्टि जूगु दु। आइतवाः देय्न्यंकं १३० म्हेसिके कोरोना संक्रमण खनेदुगु खःसा थुपिं मध्ये च्याम्ह स्वनिगयापिं लाःगु खः । थुकिया लिसें नेपालय् संक्रमण जूपिनि ल्याः१८ हजार ६१३ म्ह थ्यंगु दु। स्वास्थ्य मन्त्रालयं बिउगु जानकारी कथं आःतक कोरोना संक्रमणं नेपालय् ४५ म्हेसिया ज्यान वनेधुंकूगु दु। अथेहे संक्रमित जूपिं मध्ये अप्वःसित लनेधुंकूगु दु ।

मन्त्रालयया कथं आःतक ७०.५ प्रतिशत संक्रमितत रोगमुक्त जुइधुंकूगु दु। मन्त्रालयं साउन ६ गते चान्हय् निसें लकडाउन चाले धुंकाः न्यान्हु तक यानास्वयागु परीक्षण व थ्वयां न्ह्यवया न्यान्हुया परीक्षणया तुलना याना स्वयाबलय् लकडाउन चालेधुंकाः नं संक्रमण अप्वःगु खनेमदुगु खँ धाःगु दु। थ्व झिन्हुया दुने संक्रमिततय् प्रतिशतय् यक्व हिउपाः मवःगु खँ स्वास्थ्य मन्त्रालयया प्रवक्ता डा. जागेश्वर गौतमं धयादीगु दु ।

वय्कलं धयादीगु दु, ‘साउन २ निसें ६ गते तक पिसिआर परीक्षण यानाबलय् औसत ३.२ प्रतिशत संक्रमित पुष्टि जूगु खःसा साउन ७ निसें ११ गते तक लकडाउन चालेधुंकाःया अवधिइ औसत ३.३ प्रतिशत जक संक्रमण खनेदुगु दु ।’

मास्क मतःपिंत कारवाही यायेत निर्देशन
येँ (नेपालभाषा टाइम्स) – कोरोना भाइरस संक्रमणया ल्याः अप्वया वनाच्वंगु इलय् मास्क मतःपिंत कडा रुपं कारबाही यायेत गृह मन्त्रालयं निर्देशन बिउगु दु। मन्त्रालयं म्हिगः ७७ जिल्ला प्रशासन ज्याकू व नेपाल प्रहरीयात निर्देशनात्मक परिपत्र जारी यासें मास्क मछ्यःपिंत कडा रुपं कारबाही यायेत धाःगु खः । लिपांगु इलय् जनस्तरं लापरबाही अप्वःगुलिं जोखिम अप्वया वनेफु धासें मन्त्रालयं परिपत्र जारी याःगु खः । परिपत्रय् कारबाहीया विवरण नं न्हिथं जिल्ला प्रशासन कार्यालयं गृह मन्त्रालय छ्वयाहयेत नं निर्देशन बियातःगु दु। मास्क मतःगु द्वपनय् ज्वंपिंत संक्रमण रोग नियन्त्रण ऐन कथं कारबाही जुइ ।