यल महानगरपालिकाय् नं नेपालभाषा ब्वंकेगु निर्णय

यल -यल महानगरपालिकां नं थ्वहे दँनिसें महा– नगर मातहत लाःगु फुक्कं सामुदायिक व संस्थागत (निजी) स्कुलय् नेपालभाषा ब्वंकीगु जूगु दु । महानगरपालिकाया म्हीग च्वंगु बोर्ड बैठकं थ्व सम्बन्धी निर्णय याःगु खः ।

बोर्डं याःगु निर्णयय् धयातःगु दु– ‘मातृभाषायात अनिवार्य यासें स्थानीय विकाय समावेशी यानाः स्थानीय पाठ्यक्रम÷पाठ्यपुस्तक तयार यानाः कार्यान्वयन यायेगु जुइ । महानगरपालिका दुनेया सामुदायिक विद्यालयय् नेपालभाषाया पठनपाठन सञ्चालन यायेत थ्वहे आ.व. निसें शिक्षक जनशक्तिया व्यवस्थापन (प्रशिक्षक तथा सहायक प्रशिक्षक) प्रबन्ध यायेगु जुइ ।’

यल मनपाया बोर्डं याःगु थ्व निर्णययात आः नगरसभाया बैठकय् पेश याइगु खँ धाःगु दु । थ्वहे महिनाय् नगर सभाया बैठक नं च्वनेत्यंगु दु । नगर सभां पारित यायेवं यल महानगरपालिका अन्तर्गत लाःगु फुक्कं स्कुलय् स्थानीय विषयया रुपय् नेपालभाषा ब्वंकेगु व्यवस्था जुइ ।

यलय् नेपालभाषा ब्वंकेगु लागिं स्थानीय ज्यापु समाज लिसें थीथी खलः पुचःतय्सं पहल याना वयाच्वंगु खः । यल महानगरपालिकाय् नेपाल– भाषा ब्वंकेगु व्यवस्था जू थें यल जिल्लाय् लाःगु मेमेगु नगरपालिकाय् नं थःथःगु कथं नेपालभाषा ब्वंकेगु तयारी जुयाच्वंगु खँ सीदुगु दु ।

थ्वहे झ्वलय् येँ महानगरपालिकाया शिक्षा विभागं थः मातहत लाःगु फुक्कं स्कुलय् पौ छ्वयाः थुगु दँनिसें स्थानीय विषय कथं ‘येँ देय् म्हसीके’ सफू ब्वंकेत परिपत्र जारी याःगु दु ।

सम्बन्धित बुखँ

LEAVE YOUR COMMENTS