शंखधरया न्हापांगु किपा च्वःम्ह वैद्ययात मनपाया सिरपाः

येँ(नेपालभाषा टाइम्स)- नेपाल संवत् आन्दोलनयात ताःलाकेया लागिं योगदान याःपिं व्यक्ति व संस्थायात येँ महानगरपालिकां सम्मानित याइगु जूगु दु । थ्व झ्वलय् न्हापांगु सम्मानया रुपय् वरिष्ठ कलाकार वत्सगोपाल वैद्ययात म्हिगः ‘शंखधर साख्वाः सिरपाः’ पाखें सम्मानित याःगु खः । भाजु वैद्यं शंखधर साख्वाःया किपा च्वयाः दकलय् न्हापां सार्वजनिक यानादीगु खः ।

थिमिया ल्याय्म्ह पुचःया पहलय् थीथी नेवाः न्ह्यलुवापिनि सल्लाह कयाः वय्कलं पशुपति लागाय् च्वंगु शंखधरया मूर्ति स्वयाः उगु किपा सार्वजनिक यानादीगु खः । पशुपति लागाय् दुहां वनाः किपा च्वयाच्वन धकाः वय्कःयात प्रहरीं ज्वना नं यंकूगु खः । येँ मनपां बिउगु थ्व सिरपाः छगू लाख तकाया खः । न्हूदँ समारोह समितिया सिफारिस कथं थ्व सिरपाः आः दँय्दसं बीगु खँ धाःगु दु ।