किपू नपाय् चैत दुने २१ प्रतिशत पूँजीगत खर्च

किपू – किपू नगरपालिकाया मेयर रमेश महर्जनं वा वइगु सिजनय् लँ दयेके मबीगु प्रतिबद्धता प्वंकादीगु दु । किपू नगरपालिकां लछि–लछिइ याना वयाच्वंगु पत्रकार नापलायेगु ज्याझ्वःया झ्वलय् वय्कलं थ्व खँ धयादीगु खः । लिसें वय्कलं जेठ १५ गते दुने ज्या सिधःगुया जक भुक्तानी यायेगु खँ नं धयादीगु दु ।

पत्रकार नापलायेगु ज्याझ्वलय् किपू नगरपालिकां चैत महिना दुने याःगु थीथी ज्याया विवरण नं न्ह्यब्वःगु खः । थन न्ह्यब्वःगु विवरण कथं पुँजीगत खर्च जुइगु विकास निर्माणया ज्या चैत मसान्त तकया दुने २१.२९ प्रतिशत क्वचाःगु दु ।

चालु आर्थिक दँय् नगरपालिकायाके पुँजीगत खर्चया निंतिं ४९ करोड ८० लाख बजेट दुगु खःसा थुकी चैततकया दुने १० करोड ६० लाख ३६ हजार तका बराबरया ज्या जुइधुंकूगु खँ धाःगु दु । थुकी दकलय् अप्वः पूर्वाधार विकासय् खुगू करोड ६२ लाख ८१ हजार खर्च जूगु दुसा आर्थिक विकास क्षेत्रय् ८२ लाख ४३ हजार २८६ तका, सामाजिक विकासय् छगू करोड २३ लाख २२ हजार १५० तका, वातावरण विपद् व्यवस्थापनय् १२ लाख ५१ हजार ४७९ तका व संस्थागत विकास व सेवा प्रवाह क्षेत्रय् ६८ लाख ९५ हजार १२२ तका खर्च जूगु दु ।

ज्याझ्वलय् न्ववासें उपप्रमुख सरस्वती रिजाल खड्कां किपू दुने नगरपालिकां यायेमाःगु अनुगमन ज्या तीव्रगति न्ह्याः वनाच्वंगु खँ कनादिल । लिसें वय्कलं खाद्य अनुगमन, स्वास्थ्य अनुगमानया झ्वलय् थीथी परीक्षण यायेत आवश्यक जुइगु मेसिनत नं हयेधुनागु जानकारी बियादीगु दु ।

नगरपालिकाया न्याययिक समितिया नं संयोजक जुयाच्वनादीम्ह उपप्रमुख खड्कां थौंकन्हय् नगरपालिकाय् वइगु अप्वः थें मुद्दा समितिया न्यायिक क्षेत्र स्वयां पिने लाःगु मुद्दा वयाच्वंगु खँ कनादिल । अथेखःसां समितिइ वयाच्वंगु अप्वः थें मुद्दा मेलमिलाप पाखें हे समाधान यायेगु ज्या जुयाच्वंगु खँ कनादिसें वय्कलं नगरपालिका दुने मेलमिलाप केन्द्र याकनं स्थापना जुइत्यंगु जानकारी नं बियादिल । मेलमिलाप केन्द्रया निंतिं माःपिं मेलमिलापकर्तातय् नां धलः नं सुचिकृत जुइधुंकूगु खँ वय्कलं धयादीगु दु ।

ज्याझ्वलय् प्रमुख प्रशासकीय अधिकृत धु्रवराज आचार्यं किपू नगरपालिकां चालु आर्थिक दँय् राजश्व म्हयेगु निंतिं तयातःगु लक्ष्य पूवनीगु खँ कनादीगु दु । नगरपालिकां चालु आर्थिक दँय् झिगू करोडया राजश्व म्हयेगु लक्ष्य तयातःगु खःसा चैत तकया दुने च्यागू करोड राजश्व म्हयेधुंकूगु खँ कनादिल । अथेहे वय्कलं थांैकन्हय् कर्मचारी समायोजनया ज्यां यानाः प्रशासनिक संक्रमणकाल थें जुयाच्वंगु यक्व ज्या याये थाकुया पूँजीगत खर्च बांलाक यायेमफयाच्वंगु खँ नं कनादिल ।
ज्याझ्वलय् शिक्षा अधिकृत टंकलाल गैरं किपू नगरपालिकां आकिवं निसें किपूया स्कुलय् नं स्थानीय पाठयक्रम लागू याइगु खँ धयादिल । स्थानीय पाठ्यक्रम तयार यायेगु निंतिं ज्या न्ह्यानाच्वंगु खँ कनादिसें वय्कलं आःतक पाठ्यक्रमय् दुथ्याकेगु पाठया कन्टेक्स्ट तयार जुइधुंकूगु वइगु आर्थिक दँय् सफू छापे याकेगु ज्या जुइगु खँ कनादिल ।

ज्याझ्वलय् किपू नगरपालिकाया झिंछगूलिं स्वास्थ्य संस्थापाखें सुगर व प्रेसरया वासः वितरण ज्या सुरु जुइधुंकूगु, छात्रवृत्ति वितरण व ब्रिज कोर्ष संचालनया निंतिं सम्झौता जुयधुंकूगु, किपुली होमस्टेया प्रवद्र्धन ज्या न्ह्यायेधुंकूगु, सडक बोर्ड अन्तर्गत थीथी च्यागू थासय् लँ दयेकेगु निंतिं सम्झौता जुइधुंकूगुु, युद्धस्मारक पार्क दयेकेत, १० वडाया ज्याकु दयेकेत, ८वडाय् डिप बोरिङ्ग ट्यांकी दयेकेत, गछे दाफा खलः भवन, वडा नं. ३ या साझा भवन जिर्णोद्धारया निंतिं सम्झौता जुइधुंकूगु जानकारी नं बिउगु खः ।

अथेहे पुनर्निर्माण शाखापाखें भुखाचं पीडित लाभग्राहीपिं मध्ये ७२४ म्हेसित स्वंगूगु किस्ताया भुक्तानी जुइधुंकूगु जानकारी नं बिउगु खः ।

सम्बन्धित बुखँ

LEAVE YOUR COMMENTS