
येँ – राजनीतिक ल्वापुख्यापु बाहेक मेगु कारणं विश्व दबुली खास चर्चा मजुइगु अफ्रिका महादेशय् बुद्ध धर्म प्रवेश जूगु सछिदँ क्यंगु लसतायात विशेष रुपं हनीगु जूगु दु ।
थ्वहे वइगु डिसेम्बर ४ निसें ६ तारिख तक अफ्रिकाया तान्जानियाया दर ए–सलाम नगरय् छगू विश्व सम्मेलन हे यासें थ्व लसता हनेत्यंगु खः । उकी विश्वया थीथी देय्यापिं १०० म्ह वरिष्ठ भन्तेपिंत ब्वनातःगु दु । उकी नेपाःपाखें भिक्षु तपस्सीधम्म महास्थविरं ब्वति कया बिज्याइगु खँ सीदुगु दु । ग्वसाः खलकं नेपाःया अखिल नेपाल भिक्षु महासंघयात नं ब्वनापौ छ्वयाहःगु खः । सम्मेलनय् नेपाःपाखें सम्बोधन यायेगु लिसें नेपाःया चचा प्याखं नं क्यनीगु ग्वसाः दु ।
सन् १९२० य् तत्कालीन बेलायती उपनिवेशय् लानाच्वंगु तान्जानियाय् ज्या यायेत हयातःपिं श्रीलंकाया ४०० म्ह मनूतय्सं अन बुद्ध धर्मया पुसा पिउगु खः । लिपा श्रीलंकाया भन्तेपिं गुणपाल व लोकनाथ थेरों अन औपचारिक रुपं बुद्ध शासन शुरु यानादिल । आः तान्जानिया लगायत अफ्रिकाया मेमेगु नं देशय् बौद्ध विहारत पलिस्था जुयाच्वंगु दु । उकी मध्ये कंगोया बौद्ध विहारयात बुद्ध जन्म भूमि नेपाःयाम्ह हे बुद्ध मूर्ति माल धाःगुलिं भिक्षु तपस्सीधम्मं ४ फिट जाः दुगु छगू मूर्ति छ्वया बिज्याःगु दु ।
LEAVE YOUR COMMENTS