न्यूयोर्कया गभर्नरयात मिस्तय्त दुव्र्यवहार याःगु द्वपं

एजेन्सी- अमेरिकाया न्यूयोर्कया गभर्नर एन्ड्रीयू कुओमो प्रान्तीय सरकारया बहालवाला कर्मचारी व मेमेपिं मिस्तय्त दुव्र्यवहार व यौन उत्पीडन याःगु द्वपनय् दोषी खनेदुगु दु । वय्कःयात लाःगु द्वपंयात कयाः जूगु अनुसन्धानय् कुओमो दोषी खनेदुगु खः । अनुसन्धानं दोषी खनेदयेवं राष्ट्रपति जो बाइडेनं गभर्नर कुओमोया राजीनामा फ्वंगु दु । न्यूयोर्कया महान्याधीवक्ता लेटिसना जेम्सं नं गभर्नर कुओमों राज्यया कानून हाचां गाःगु धाःगु दु ।

अमेरिकाया थीथी सांसदतय्स नं कुओमां गलत ज्या याःगु व गभर्नर जुयाच्वनेगु अधिकार मदुगु धाःगु दु । कुओमायात महाअभियोग तयेत नं प्रस्ताव वःगु दु ।

गभर्नर कुओमोयात लाःगु द्वपंयात कयाः न्यालातक अनुसन्धान जूगु खः । अनुसन्धानया झ्वलय् सैनिक, कर्मचारी व कुओमोयात द्वपं बिउपि दक्वं यानाः थ्यंमथ्यं निसःम्हेसिके न्यनेकने याःगु खः । अनुसन्धानं कुओमो प्रशासनय् कर्मचारीत तसकं खराब व भययुक्त वातारवरणय् ज्या यानाच्वंगु खनेदुगु खः । महान्याधीवक्ता लेटिसना जेम्सं अनुसन्धानया झ्वलय् कुओमों मिस्तय्त दुव्र्यवहार व यौन उत्पीडन याःगु व कुओमों संघ व राज्यया कानून हाचां गाःगु धाःगु खः । थीथी अन्तर्राष्ट्रिय सञ्चार माध्यमं अनुसन्धानं कुओमा दोषी खनेदुगु धाःगु दु ।