बचतकर्तातय् ध्यबा सुरक्षित याइगु निकाय दयेमाः

सहकारी स्थापना यायेमाःगु कारण छु खः ?
जिमिसं सहकारी चायेके स्वयां न्ह्यः पिने जिल्लां वःपिंसं सहकारी चायेकेगु ज्या यानाच्वंगु खः । पिनें वःपिंसं चायेकूगु थज्याःगु गुलिखे सहकारी बिसिउँ वंगु खः । बिसिउँ वंपिं मनूत पिनेयापिं जूगुलिं आपालं नेवाःतय् ध्यबा नयावंगुलिं नेवाःतय् ध्यबा स्थानीय मनूतय्सं चायेकूगु सहकारीइ तयाः बचे यायेमाः धयागु तायेकाः थ्व सहकारी चायेकाःगु खः । उगु इलय् जिं नं मेपिनिगु सहकारीइ ध्यबा तयेगु यानाच्वनागु खः । अले उगु सहकारी जिगु नं ध्यबा नयाः वंगुलिं नं नेवाःतय्त बचे यायेमाः धकाः बिचाः यानाः सहकारी चायेकागु खः ।

सहकारीया आज्जु छु खः ?
नेवाःतय् दथुइ छम्हं मेम्हेसित सहकार्य यानाः ग्वाहालि यायेगु आज्जु कथं थुगु सहकारी चायेकागु खः । अथे हे सामाजिक, आर्थिक व भौतिक रुपं छुं नं कथंया समस्या वल धाःसा उकियात ज्यंकेगु निंतिं नं सहकारी चायेकागु खः ।

सहकारीया अवस्था गथे दु ?
खास हे समस्या मदु । हरेक दँय् नाफाय् वनाच्वंगु दु । दँय्दसं सदस्यतय्त बोनस बियाच्वनागु दु । बैंकय् तरलताया समस्या दुसां नं सहकारी तरलताया समस्या मदु । माः कथं तरलताया व्यवस्था याना तयागु दु । ३ निसें ४ करोड तका झीसं तरलता कथं तयातयागु दु । सहकारीइ त्यासा कयाः ध्यबा नयाः सुं नं बिसिउँ वन धाःसा समस्या जुइगु खः । तर झीथाय् अथे बिसिउँ वनेफइगु अवस्था हे मदु । थन कारोबार याइपिं फुक्क धयाथे नेवाःत जूगुलिं यानाः खास समस्या मदु । अथे हे झीसं जग्गा जमिनय् लगानी मयाना, उकिं यानाः नं खास हे छुं समस्या मदु ।

सहकारीपाखें सदस्यतय्त छु फाइदा जुयाच्वंगु दु ?
ई कथं बचत यानाच्वंपिं सदस्यतय्त उचित ब्याज बियाच्वनागु दु । अथे हे थौंकन्हय् मत, लः, बिमा, टेलिफोनया ध्यबा पुलेगु आदि सेवा सहकारी मार्फत बियाच्वनागु दु ।

सहकारीपाखें दुजःतय्गु आर्थिक विकास जूगु दु कि मदु ?
सुं नं सहकारीया दुजःपिंसं छुं नं ज्या यायेगु निंतिं आर्थिक समस्या जूसा ग्वाहालि यानाच्वनागु दु । तर अथे धकाः बिना धितो त्यासा बीगु ज्या धाःसा मयाना । यदि सुयां थम्हं गाडी न्यानाः चले यायेगु इच्छा दु तर सम्बन्धित दुजःयाके पर्याप्त ध्यबा मदुसा सहकारीं माःगु त्यासा बियाः ग्वाहालि यायेगु ज्या जुयाच्वंगु दु ।

सहकारीपाखें सामाजिक ज्या जुयाच्वंगु दु कि मदु ?
सामाजिक ज्या नं यानाच्वनागु दु । गथे ज्याथ–जिथिपिं सहकारीया दुजःपिंत ग्वाहालि यायेगु, सम्मान यायेगु ज्या यानाच्वनागु दु । अथे हे सहकारीया दुजःपिनि जेहेन्दार मस्तय्त छात्रवृत्ति बीगु, हिदान यायेगु आदि ज्या सहकारीपाखें यानाच्वनागु दु ।

संस्थाया चुक्ता पुँजी गुलि दु ?
संस्थाया चुक्ता पुँजी ३ करोड स्वयां अप्वः हे दु । अथे हे लगानी १८ करोड तका जुयाच्वंगु दु ।
सहकारीइ आः स्थानीय निकाय अन्तर्गत वनेत्यंगु दु । थुकिं छुं समस्या वइगु खनादिया ला कि ?
नेपाल सरकारया नियम कथं खास हे समस्या मदु । समस्या वलधाःसा उकिया समाधान यायेगु दायित्व झीगु खः । सरकार स्वयम थः हे इमान्दार जुयाः वन धाःसा सहकारीयात न्ह्यागु निकायं नं स्वःसां नं छुं पाइमखु ।

सहकारी समस्या गज्याःगु इलय् वइ ?
छम्ह निम्ह दुजलं छगू सहकारीइ बेइमान यायेवं फुक्कं धयाथें सहकारीइ समस्या वइ । छगू सहकारी बिसिउँ वनेवं फुक्कं सहकारी अज्याःगु हे खः ला धइगु भावना ब्वलनीगु स्वाभाविक खः । अथे जुयाः त्यासा बीगु इलय् धन जमानी च्वनीपिंसं नं थम्हं नियम कथं त्यासा काःम्हेसित त्यासा पुलेगु निंतिं दबाव बीगु आदि ज्या यानाच्वनेमाः । त्यासा काइपिं व धनजमानी च्वनीपिं इमान्दार जुलधाःसा खास समस्या मदु ।

अन्तय् छु धयादी ?
सहकारी संस्था समस्याय् लात धाःसा उकिया जिम्मेवारी काइगु निकाय मदु । यदि छुं बैंक डुबे जुइगु अवस्था वल धाःसा राष्ट्र बैंकं उगु बैंकयात थःगु अधिनय् हयाः बचतकर्ताया ध्यबा सुरक्षित यायेगु यानाच्वंगु दु । सहकारीया हकय् नं उकथंया हे नियम हयेमाः । थथे जुलधाःसा सहकारी प्रति जनताया विश्वास नं अप्वइ । जनताया ध्यबा सुरक्षित यायेगु ज्या सरकारया खः । अथे जुयाः सरकारं अज्याःगु निकाय दयेकेगु ज्या यायेमाः थें च्वं ।