नेवाः भाय् च्वये ब्वने सयेकेगु प्रशिक्षण

यल(नेपालभाषा टाइम्स)-मिसा साहित्यकार मुनाया ग्वसालय् नेपालभाषा अःपुक च्वये ब्वने सयेकेगु सम्बन्धी प्रशिक्षण ज्याझ्वः जुल । मिसापिं साहित्यकारतय्त लक्षित यानाः न्ह्याकूगु उगु प्रशिक्षण ज्याझ्वः थनया त्यागलय् च्वंगु नेपालभाषा मंकाः खलःया ज्याकुथिइ जूगु खः ।

ज्याझ्वलय् भाषाह्यःमि पौभाः साय्मिं नेवाः भाय् गुकथं मद्वंक, अःपुक व यइपुक च्वयेगु व ब्वनेगु धइगु बारे सैद्धान्तिक प्रशिक्षण बियादीगु खः ।

नेपालभाषा मंकाः खलः यलया नायः हिराकाजी महर्जनं झीसं झीगु हे भाय् छ्यलाबुला यायेमाःगु खँय् बः बियादिसें यल देशय् नेपालभाषाया अवस्था व मंकाः खलकं याना वयाच्वंगु थीथी गतिविधि बारे कनादीगु खः ।

संस्थाया नायः अञ्जना ताम्राकारं थःपिनिगु संस्थां भाषा व साहित्यया ख्यलय् थीथी ज्याझ्वः याना वयाच्वनागु जानकारी बियादिसें नेवाः भाय् अःपुक च्वये, ब्वने सयेकेगु थुकथंया प्रशिक्षणं मिसा साहित्यकारतय् क्षमता अभिवृद्धि जुइगु विश्वास प्वंकादिसें थुकथंया प्रशिक्षण वइगु दिनय् नं न्ह्याका वनेगु जुइ धयादिल ।

संस्थाया न्वकु दिव्या ताम्राकारं लसकुस यानादीगु ज्याझ्वलय् आपालं मिसा साहित्यकारपिनिगु उपस्थिति दुगु खः ।