‘भाषा ऐन हयेत पाय्छिकथं ज्या जुयाच्वंगु मदु’
येँ (नेपालभाषा टाइम्स) – भाषा ऐन कार्यान्वयनया निंतिं सम्बन्धित जातिं माक्वः दबाब बीमाःगु खँ सम्बन्धित सांसदपिसं धाःगु दु ।
म्हिगः नेवाः राजनीतिक महागुथिया ग्वसालय् नेपालभाषा मंकाः खलः ससुख्वातय् जूगु ‘प्रादेशिक भाषा विधेयक- कार्यान्वयनय् हाथ्या व समाधान’ विषयस जूगु ज्याझ्वलय् न्ववायेगु झ्वलय् सांसदपिसं उगु बिचाः प्वंकूगु खः ।
बागमति प्रदेशया पुलांम्ह मन्त्री लिसें प्रदेशसभा दुजः गंगानारायण श्रेष्ठं वर्तमान प्रदेश सरकारं भाषा ऐन कार्यान्वयनया निंतिं पाय्छि कथं ज्या याना मच्वंगु खँ धयादिसें सम्बन्धित जातिं दबाब बीमाःगु सुझाव बियादीगु खः ।
ज्याझ्वलय् न्ववायेगु झ्वलय् वयकलं भाषा ऐन कार्यान्वयनया निंतिं माःगु नियम व कार्यविधि दयेके माःगु खःसा नं उखे पाखे सरकारया ध्यान मवंगु खँ धयादीगु दु । वय्कलं धयादिल, ‘भाषा विधेयक वयेधुंकाः राष्ट्रभाषा विकास प्रतिष्ठान व विज्ञ पुचः नीस्वने माःगु खः । तर उखे पाखे ज्या याये गु त्वःताः सरकारं भाषा, संस्कृति, कला, साहित्य विकास प्रतिष्ठान विधेयक हयेगु कुतः यानाच्वंगु दु । थ्व पाय्छि अःखः ज्या खः ।’
सांसद श्रे ष्ठं थनिंनिसें प्रदेशसभाय् नीति व कार्यक्रमयात कयाः सहलह जुइगु जानकारी बियादिसें भाषा ऐन कार्यान्वयनया निंतिं माःगु बजेटया व्यवस्था यायेत थःपिसं सः थ्वयेकेगु जानकारी नं बियादीगु दु ।
उकथं हे मे म्ह प्रदेशसभा दुजः समिता खड्गी श्रे ष्ठं थौंकन्हय् संसदय् सांसदतय्सं नेवाः भासं न्ववायेगु ज्या मयानाच्वंगु धासें दुःख प्वंकादीगु दु । वय्कलं धयादिल, ‘संसदय् आपालं नेवाः सांसदपिं दु । तर उमिसं संसदय् न्ववायेगु झ्वलय् नेवाः भासं थःगु खँ तयेगु यानाच्वंगु मदु । थुकिं यानाः जितः दुःख तयाच्वंगु दु ।’
अथे हे ज्याझ्वलय् प्रदेशसभा दुजः शैलेन्द्र वज्राचार्यं भाषा विधेयक कार्यान्वयन यायेगु खःसा नेवाः देय् दबू व तामाङ घेदुङ संघ हे न्ह्यःने वयेमाःगु सुझाव बियादीगु दु । वय्कलं बागमति प्रदेश सरकारं आधिकारित रुपं मसिउगु संस्था धइगु नेवाः देय् दबू व तामाङ घेदुङ संघ जूगु धासें निगू संस्थां बिस्कं बिस्कं ज्याझ्वः यायेगु स्वयां नेवाः व तामाङ जानाः सरकारयात दबाब बीमाःगु खँ धयादिल ।
महागुथिया दुजः दिलिप शाही लसकुस यानाः न्ह्याःगु ज्याझ्वलय् अनुप सिंह सुवालं कार्यपत्र न्ह्यब्वयादीगु खः । ज्याझ्वलय् नेपालभाषा मंकाः खलःया अध्यक्ष रमेशमान पियां भाषा ऐन कार्यान्वयनया सवालय् गुकथं न्ह्याःवने गु धइगु खँय् सहलह जुइमाःगु बिचाः प्वंकादगिु दु ।
जयाझ्वलय् प्रा.डा. ओमकारेश्वर श्रेष्ठं भाषा विधेयक दयेकेगु झ्वलय् थःगु अनुभव कनादीगु खः । ज्याझ्वलय् नेपाल लिपि गुथिया नायः निरञ्जन ताम्राकार, विवेकशील पार्टीया अध्यक्ष सिंहबहादुर मोक्तान, उपाध्यक्ष रितेश मल्लपिसं नं थःथःगु बिचाः प्वंकादीगु खः । ज्याझ्वः महागुथिया संयोजक माधव स्यस्यं न्ह्याकादीगु खः ।
LEAVE YOUR COMMENTS