ने. सं. ११४६ बछलाथ्व पञ्चमी - दयावीरसिं बुदिं

लुम्बिनीइ हिन्दू ज्याझ्वः यायेत्यंगुया विरोध

येँ (नेपालभाषा टाइम्स)- बुद्ध जन्मभूमि लुम्बिनीइ भारतया हिन्दू गुरु मोरारीबापुं रामकथा कनीगु धकाः वःगु सुचंयात धर्मोदय सभां विरोध प्रकट याःगु दु । लुम्बिनीया नवनिर्मित सभा हलय् थ्वहे वइगु माघ २१ गतेनिसें माघ २९ गते तक थ्व रामया बाखं कनेगु धकाः सुचं पिहां वःगु खः ।

भगवान बुद्धया जन्मभूमि लुम्बिनीइ हिन्दू धर्मलिसे सम्बन्धित ज्याझ्वः यायेगु पाय्छि मखु धासें धर्मोदय सभां थज्याःगु ज्याझ्वः पनेमाःगु खँ धाःगु दु । सभाया महासचिव सागरमान वज्राचार्यं जारी याःगु उगु वक्तव्यय् लुम्बिनीइ बौद्ध धर्म अःखः छुं नं कथंया ज्याखँ याये मजिउगु खँय् नं सचेत याःगु दु ।