विज्ञतय् आग्रह

नर्मदेश्वर प्रधान

ग्रीष्मबहादुर देवकोटा नेपाःया प्रेस, पत्रपत्रिकाया इतिहास विषयया छम्ह विज्ञ खः । वय्कलं ‘नेपाःया राजनीतिक दर्पण’ नामं सफूत पिथनादीगु दु । वय्कःया ‘नेपाःया राजनीतिक दर्पण’ सफूया थःगु हे विशेषता दु । विशेष यानाः देय्या राजनीति, राजनीतिज्ञतय् विषयय् विश्वसनीय, तथ्य, सूचनात सीकेत सफू ज्याख्यलय् वइ ।

छम्ह राजनीतिक नेतां छथाय् भाषणय् छु धाल, हाकनं मेगु भाषणय् छु छु पाःगु वा अःखःगु खँत धाल, अज्याःगु विसंगतितय् टिपोट नेतातय् खँग्वलं हे वय्कलं सफुतिइ न्ह्यथनातःगु दइ । सफू ब्वनेबलय् गुलिखे नेतातय् धुलमुल, अवसरवादी, असन्तुलित चरित्र बारे खुलासा जुइ । नेतातय् चारित्रिक मूल्यांकन यायेत थ्व सफू आधार ज्वलं जुइ ।
छम्ह बुद्धिजीविं नवाःगु न्यने । थौं देशय् जनताया स्मरण शक्ति कमजोर जूगु खः वा स्मरणशक्तिं ज्या मकाःगु खः ! राजनीतिइ स्मरण शक्ति छ्यःगु खनेमदु ।

नेतातय्सं छथाय् छु धाइ, पलख लिपा मेथाय् मेगु हे अन्तरविरोधी खँ ल्हाइ । थःगु धापूप्रति भ्याःभचा हे इमान्दारिता क्यनीमखु । अःखः लाक्वपाक्व खँ ल्हानाः जनतायात झंगः लानाच्वनी । ध्वं लानाच्वनी । थ्व नेतातय् गैर जिम्मेवारी राजनीतिक चरित्र जनताया स्मरण शक्तियात चुनौति मखुला ? म्हिगः नेतातय्सं छु धाल ? छु यात ? भुसुक्क ल्वःमंकाः आः छु धाल उकिया हे लहलहय् वनेगु, विश्वास यायेगु जनताया प्रवृत्तिं नेतातय्के थज्याःगु राजनीतिक, अनैतिकता, दुस्साहस ब्वलंगु खः । विज्ञतय् धापू दु ।

थौं देशय् एमालेया निगू गुटया ल्वापुं यानाः देय् हे अस्तव्यस्त जूगु दु । पार्टीया ल्वापु पार्टीइ जक सीमित मजुसे देय् जनताया जीवनय् नं थुकिं प्रतिकूल प्रभाव लाकूगु दु । अझ पार्टी दुने नं सैद्धान्तिक खँयात कयाः मखु निम्ह नेतातय् आपसी महत्वकांक्षाया कारणं पार्टी दुनेया ल्वापुं विकराल रुप काःवनी । व्यक्तिगत स्तरया निम्ह नेताया दम्भं थौं देय्, जनता अझ स्वयम राष्ट्र हे अन्योलया स्थितिइ लाःवन । गुलिसिया धापु दु थौं एमालेय् वःगु कटुता, विभाजनया मूल कारण एमाले व माओवादीया अस्वाभाविक एकीकरण खः ।

एमाले व माओवादीया एकीकरण सैद्धान्तिक मिलनविन्दु व सांगठनिक एकरुपताया छुं ठेगान मयासे निम्ह नेतातय् सहमतिं जक जुइ । विश्वया प्यंगूगु कम्युनिष्ट राष्ट्र जूगु गर्वबोध कार्यकर्तातय्त याकी । देशय् राज्यशक्ति न्यादँतक थःगु ल्हाती निम्हित जुइ । विश्वास याइ । खः, सही सैद्धान्तिक जगय् इमान्दारितां निगू पार्टी दथुइ मन, कर्म व वचनं एकीकरण जूगु खःसा छगू शक्तिशाली दलया उदय जुयाः देय्या हीत जुइगु जुइ ।

तर एमाले व माओवादीया निम्ह नेतातय् पूर्व स्वापूया स्मरणं धाइ इमि दथुइ छगू इलय् थज्याःगु आक्रामक स्वापू दयाबी, छम्हं मेम्हेसित निरन्तर लाक्वपाक्व धाःगु रेकर्ड खनेदइ ।

थज्याःगु हे पारस्परिक कटु स्वापू दुपिं निम्ह शीर्षस्थ नेतातय् जगय् एमाले व माओवादी दथुइ एकता जुल । खला राजनीतिइ स्थायी शत्रु धइपिं दइमखु धाइ । अथे हे स्थायी मित्रु नं दइमखु धाइ ।

नेकपाया गठनं निम्ह तिक्त स्वापू दुपिं नेतातय्त मित्रु यानाबी । तर हाकनं मित्रवत स्वापू विघटन जुइ ….. नेकपा तज्याइ ….. साविक एमाले व माओवादी दलय् लिहां वइ । नेकपाया अन्त्य जुइ । तर थुकिया प्रभावं अनेक जटिल समस्यात थनी । एमाले दुने तःधंगु भुखाय् ब्वइ । एमालेया निम्ह शीर्षस्थ नेता दथुइ घमासान संघर्ष जुइ । पार्टीइ विभाजन खनेदइ । एमालेया सरकार संवैधानिक संकटय् लाइ । देशय् तःधंगु राजनीतिक उथल पुथल जुइ ।

देशय् थौंया राजनीतिक दुश्परिणाम खः एमालेया विभाजन । देशय् छगू राजनीतिक शक्ति जुयाः लुइधुंकूगु पार्टी एमालेया बेहाल स्थिति देय्या दलीय राजनीतिक व्यवस्थाया लागि दुःखद् जुल । जुइ । शायद एमाले व माओवादी दथुइ एकता मजूगु खःसा एमालेया थज्याःगु दुर्दशा मजुइगु खः । धाइपिं नं दइ । न्यनेदु माओवादीया नेता प्रचण्डं नेता माधवयात एकतावद्ध जुयाः वनेत प्रस्ताव तःगु दु । एकता बांलाः । थुकी शंका मदु । थन सम्पूर्ण कम्युनिष्ट एकतायात कयाः खूब सः थ्वयेकी । तर मेखे छगू कम्युनिष्टं मेगु कम्युनिष्ट पार्टीयात कम्युनिष्ट हे मखु धकाः ब्वः बियाच्वनी । नकारे याइ । अय्नं आश्चर्य ! कम्युनिष्ट एकताया नारा बियां तुं च्वनी । थ्वया च्वनी । हावाया भरय् ! आत्मीयता मदुगु एकताया गति छु जुइ ? नेकपाया विघटनं क्यनी । एकताया म्हगस इनाः देय्यात अलमल याये मजिल ।

एकता शुद्ध मजुल कि देय् गन थ्यनी ?! देशं भोग यायेधुंकल । धाइ देशय् थौं संवैधानिक समस्या वल । देय् खतराय् लात । थ्व फुक्क परिणाम जक खः । राजनीतिक विश्लेषणया लागि परिणामया चर्चा जक यानाः मगाः । कारणयात नं सीकेमाः । कारण सीकेत विज्ञतय्सं थःगु तीक्ष्ण स्मरण छ्यलाः राजनीतिक पृष्ठभूमिया विश्लेषण यायेमाm । शक्तिया लागि वर्तमान नेपाःया राजनीतिक दर्पण अनिवार्य जुइ । विज्ञतय् आग्रह जुइ ।

सम्बन्धित बुखँ

LEAVE YOUR COMMENTS