भद्र बन्दीगृहय् बुद्ध पुजा

येँ – २५६२ क्वःगु बुद्धजयन्तीया लसताय् बौद्ध सामाजिक शिक्षा तथा विकास केन्द्रया ग्वसालय् स्वनिगःया थीथी जेलय् दँय्दसं जुया वयाच्वंगु बुद्ध पुजा वंगु शुक्रवाः व शनिवाः जुल । शुक्रवाः येँया भद्र बन्दीगृहय् बुद्ध पुजा जूगु खःसा शनिवाः धौख्यःया जेलय् पुजा जूगु खः । येँया भद्र बन्दीगृहय् जूगु बुद्ध पुजाय् अखिल नेपाल भिक्षु महासंघया महासचिव भिक्षु कोण्डन्यं पञ्चशील व त्रिरत्न पाठ याकाबिज्याःगु खः ।

ज्याझ्वलय् नेपाल बौद्ध महासंघया पुलांम्ह नायः जिग्दोल लामा लिसें बुद्धजयन्ती समारोह समितिया उपाध्यक्ष गौतम शाक्य, वज्रयान महासंघया नायः राजेन्द्रमान वज्राचार्य, बौद्ध विद्वान शान्तरत्न शाक्य, सुरक्षा प्रमुख डीएसपी मित्रबन्धु शर्मा, बन्दीगृहया का.वा. जेलर श्रवणकुमार साह, बन्दीगृहया हेडमास्टर प्रशान्त कुँवरपिंसं बुद्धया उपदेश व बन्दी जीवन हनाच्वंपिं कैदीतय्सं बांलाःगु जीवन यापनया लागिं पालना यायेमाःगु शीलया बारे कनादीगु खः ।

ज्याझ्वलय् केन्द्रया नायः लिसें संयोजक विजयरत्न तुलाधरं लसकुस यानादीगु खःसा दुजः सविनराज शाक्यं सुभाय् बियादीगु खः । उगु ज्याझ्वलय् थीथी भन्तेपिं लिसें उपासकउपासिकापिनि उपस्थिति दुगु खः । ज्याझ्वः न्ह्यः जेल परिसरय् हे पलिस्था यानातःगु भगवान बुद्धया मूर्ति न्ह्यःने बुद्ध पुजा यायेगु ज्या जूगु खः ।

बौद्ध शिक्षा तथा सामाजिक विकास केन्द्र नेपालपाखें येँया भद्र बन्दीगृहय् वंगु वि.सं. २०६१ सालंनिसें बुद्धजयन्तीया लसताय् थज्याःगु ज्याझ्वः याना वयाच्वंगु दु । बुद्ध मूर्ति पलिस्था जुयाच्वंगु थ्व नेपाःया हे न्हापांगु जेल खः । उगु बुद्ध मूर्ति मदुम्ह भिक्षु आचार्य कुमार काश्यप महास्थविरं बु.सं. २५४८ स उलेज्या यानाबिज्याःगु खः ।