
येँ (नेपालभाषा टाइम्स)- नेपालभाषा मंकाः खलःया दबूछेँ निर्माण सम्पन्न जूगुलिं शनिवाः मंकाः खलःयात हस्तान्तरण याइगु जूगु दु ।
येँया १५ वडास्थित विजेश्वरीइ च्वंगु मंकाः खलःया थःगु हे जग्गाय् येँ महानगरपालिकां उगु दबूछेँ दना बिउगु खः ।
येँ मनपाय् विद्यासुन्दर शाक्य मेयर जूगु इलय् वय्कःया हे पहलय् मंकाः खलःया छेँ दनेत बजेटया व्यवस्था जूगु खः । आः निर्माण सम्पन्न जूगुलिं शनिवाः छगू ज्याझ्वःया दथुइ मंकाः खलःया ज्यासना पुचःयात दबूछेँ लःल्हायेत्यंगु खः ।
शनिवाः जुइगु ज्याझ्वलय् मंकाः खलःया नायः लिसें जनकवि दुर्गालाल श्रेष्ठ, येँ मनपाया उपमेयर सुनिता डंगोल व येँ मनपा १५ वडाया वडा अध्यक्ष ईश्वरमान डंगोल स्वम्हपाखें मंकाः कथं थुकिया उलेज्या याइगु खँ धाःगु दु । वय्कःपिंसं मंकाः खलः उलेज्याया ल्वहंपौ उलेज्या यासें दबूछेँ नं मंकाः खलःयात लःल्हानादी ।
स्वनिगःया नेवाःतय्सं वंगु ताः ई न्ह्यवंनिसें नेवाःतय्गु थःगु हे दबूछेँ दनेगु धकाः अभियान न्ह्याका वयाच्वंगु खःसा उकिया लागिं थीथी कथंया आन्दोलन याना वःगु दु । थ्व झ्वलय् विजेश्वरीइ झी कवि चित्तधर हृदयं दान बिउगु लिसें मंकाः खलःपिंसं हे न्याना तःगु जग्गाय् थ्व छेँ दनेगु ज्या जूगु खः । थन आः नियमित रुपं कला, साहित्य सम्बन्धी ज्याझ्वःत जुइगु खँ धाःगु दु ।
LEAVE YOUR COMMENTS