सिक्किमय् पहिचानया लागिं भाषा कक्षा

येँ – सिक्किमया नेवाःतय्त नेवाः भाय् स्यनेगु कक्षा हानं शुरु जूगु दु । चिकुलाया इलय् भाय् स्यनेगु कथं वंगु वालय् सिक्किमया सिङतामय् थ्व कक्षा शुरु जूगु खः । नेवाः भाय् ब्वनेकुथिया ग्वसालय् लछियंकं न्ह्याइगु कथं थ्व कक्षा न्ह्याःगु खः । सिक्किम प्रहरीया मोटोर भेहिकल इन्स्पेक्टर महेन्द्र प्रधान मू पाहां कथं झाःगु कक्षाया उलेज्या समारोहय् नांजाःम्ह कलाकार उत्तम कलाकार पाहां कथं झाःगु खः । लिसें ज्याझ्वलय् मेपिं नं थीथी हनेबहःपिंसं ब्वति काःगु खः ।

उगु कक्षाय् ब्वति कायेत ४० म्ह मिसा मिजं सहभागीतय्सं नां च्वकूगु दु । कक्षा शिक्षक मय्जु निशा प्रधानं कयादी । नेवाः भाय् स्यनेकुथिपाखें वंगु ताल्लाय् नं भाषा लगायत नेवाः संस्कृति व नसात्वँसा दयेकेगु तालिम कक्षा सञ्चालन याःगु खः । उगु कक्षाय् ६० म्हेस्यां ब्वति काःगु खः । वयां लिपा स्यनेकुथिं थ्व कक्षा नियमित सञ्चालन यायेगु निर्णय याःगु खः ।

नेवाः भाय् स्यनेकुथिया नायः विनोद प्रधानं नेवाः जातिया दकलय् महत्वपूर्ण अंग भाय् खः धासें सिक्किमय् नेवाःतय् पहिचान कायम यायेगु खःसा भाषा स्यनेगु अतिकं महत्वपूर्ण जूगु कारणं थज्याःगु कक्षा सञ्चालन यानागु खँ कनादिल । छक्वः कक्षा सञ्चालन यायेधुंकाः हानं हानं कक्षा चले याये माल धकाः तःगूथासं इनाप वःगुलिं थःपिंसं हानं कक्षा सञ्चालन यानागु खँ नं वय्कलं कनादिल । नेवाः भाय् स्यनेकुथिं ज्या हे यानाः नेवाःतय्त जागृत याना वयाच्वंगु दु ।