बौद्ध विद्वानलिसें चचा प्याखं गुरु वज्राचार्ययात तःजिगु हना
येँ (नेपालभाषा टाइम्स) – बौद्ध विद्वानलिसें नेपाःया नांजाःम्ह चचा प्याखं गुरु यज्ञमानपति वज्राचार्ययात छगू तःजिगु ज्याझ्वःया दथुइ हनेज्या याःगु दु । येँ महानगरपालिका, युनेस्को तथा काठमाडौं सिटी अफ फिल्म्सया मंकाः ग्वसाः व नेपाः डान्स एकेडेमी, बौद्ध दर्शन अध्ययन पुचः व नेपाः सांस्कृतिक पुचःया सहकार्यय् वंगु शनिवाः थनया राष्ट्रिय नाचघरय् जूगु ज्याझ्वलय् वसपोलयात हनेज्या याःगु खः ।
‘चर्या प्रवाह गुरु यज्ञमानपति वज्राचार्य एकल साँझ’या नामं जूगु ज्याझ्वलय् वसपोलयात ज्याझ्वःया मूपाहां येँ महानगरपालिकाया कार्यवाहक प्रमुख सुनिता डंगोलं हनेज्या यानादीगु खः । उगु इलय् नेपाः डान्स एकेदेमिपाखें नं वसपोलया विशेष हनेज्या याःगु खः ।
ज्याझ्वलय् न्हय्न्याम्ह कलाकारं गुरु वन्दना, पँय्ताः मू द्यःल्हायेगु, रत्नमण्डल अर्पण, पञ्चोपचार अर्पण, षोडषलास्य, पद्मनर्तेश्वर, एवममया, नामसंगीति, कुरुकुल्ला, वज्र-सरस्वती, कालभैरव, बुंगम लोकेश्वर, जय जयबागेश्वरी, वज्रवीर महाकाल र वज्रसत्वसत्ताक्षर हुलाप्याखं न्ह्यब्वःगु खः । वज्रयान बौद्ध दर्शनय् आधारित थुपिं प्याखंत स्वनिगःया बौद्धमार्गी समुदायं थीथी देवदेवीया स्वरुप, भाव, मुद्राय् थ्व प्याखं क्यनेगु याना वयाच्वंगु दु ।
ज्याझ्वलय् नवासें कार्यवाहक प्रमुख डंगोलं गुरु यज्ञमानपति वज्राचार्यं लोभ, लालच, आशा मयासे, गुगुं जात, उमेर, वर्ग, समुदाययात भेदभाव मयासे सकसितं समान रूपं शिक्षा प्रदान याना वयाच्वनाबिज्याःगु खँ कनादिल । चचा प्याखंयात पुस्तान्तरणय् उल्लेखनीय योगदान यानाबिज्याःगुलिं वसपोल गुरुयात हनेज्या यानागु नं वय्कलं धयादीगु खः ।
‘जिं थ्व स्वयां न्ह्यः छु यानाच्वना धइगु खास हे अनुभूमि मजू, तर थौं येँ महानगरपालिकां थुलि तःधंगु ज्याझ्वः यानाः जिं यानाच्वनागु ज्या जितः क्यनाबिल’, गुरु यज्ञमानपति वज्राचार्यं धयाबिज्यात, ‘जिं बांलाःगु हे ज्या याना खनि धइगु अनुभूति जुल । थौंया थ्व वातावरणय् देवदेवीया अलौकिक उपस्थिति जुयाच्वंगु महसुस जुल ।’
थज्याःगु अध्यात्मिक व सांस्कृतिक ज्याझ्वः दुर्लभ जुइ, थौं जिं थःगु जीवन सार्थक जूगु महसुस यानाच्वना धयाबिज्यासें येँ महानगरपालिकायात विशेष आभार नं प्वंकाबिज्यात ।
पुचःया नायःलिसें एकेदेमिया प्रमुख संरक्षक रिना महर्जनं शास्त्रीय हुलाप्याखंया गरिमा व परम्परा संरक्षण यायेमाःगु अवस्था वःगुलिं थुकथंया ज्याझ्वः ग्वसाः ग्वयागु जानकारी बियादिल ।
एकेदेमिया अध्यक्ष रोहिया महर्जनं चचा प्याखंया विकास व विस्तार यात कयाः जानकारी बियादिसें थुकथंया ज्याझ्वलं चर्चा प्याखंया विकास व विस्तारय् अझ ग्वाहालि जुइगु विश्वास प्वंकादिल ।
LEAVE YOUR COMMENTS