विराटया चिधं दबुलिइ प्रदीप शाक्य

ख्वप (नेपालभाषा टाइम्स) – विराट नेपालभाषा साहित्य सम्मेलन गुथि (विराट गुथिं) लय्पतिकं न्ह्याका वयाच्वंगु ‘विराट चिधं दबुलि’इ थुगुसी विराटया पुलांम्ह नायः व छ्याञ्जे प्रदीपरत्न शाक्यया याकः चिनाखँ वाचन ज्याझ्वः जुल । दबुलिइ कवि शाक्यं करिब नीन्यादँ न्ह्यःनिसें च्वयादीगु चिनाखँ न्यंकादीगु खः ।

ज्याझ्वलय् कवि शाक्यं ‘शान्ति’, ‘समस्या’, ‘क्वाःगु हिंला जीवन बीमाःगु खः’, ‘लःया फुति झी, धुँ’, ‘थौंया जिगु देय्’, ‘निभाः जीवन सिर्जना खः’, ‘न्हूगु वस्तु ला सिर्जना यायेमाः’, ‘थःगु हे विश्वास म्वयाच्वन’, ‘थौं जिगु देय्, इतिहासं म्वाय् नकाच्वंम्ह जि’ आदि शीर्षकया छगू दर्जनं मल्याक चिनाखँ न्यंकादीगु खः । २०३९ सालंनिसें २०६२ साल तकया दुने पिस्कर हत्याकण्डनिसें जुजु ज्ञाने न्द्रया पतन तकया घटनायात दुथ्याकाः सिर्जना यानादीगु चिनाखँ न्ह्यब्वयादीगु खः । पंचायतकाल, बहुदलीय प्रजातन्त्र व लो कतान्त्रिक गणतन्त्रया ई तकया प्रतिनिधित्व याइकथं चिनाखँ वय्कलं न्ह्यब्वयादीगु खः ।

विराटया नायः महेन्द्रगोपाल कर्माचार्यं लसकुस यानादिसें ज्याझ्वःया उद्देश्ययात कयाः ध्वथुइकादीगु ज्याझ्वलय् सभापतिया थासं नविनप्रकाश श्रेष्ठं दार्शनिक, विद्रोही व शान्तिया भावना ब्वलंके कथं कविता च्वयाः छम्ह कविया उच्च मनोभावना कवि शाक्य ताःलागु खँ कनादिल ।

विराटया ज्यासना पुचःया दुजः सुलोचना सैंजूं न्ह्याकादीगु ज्याझ्वलय् वरिष्ठ कवि डा. योगेन्द्र प्रधान, कृष्णभक्त बोडे , पशुपतिमान पःमाः लगायतया साहित्यकारतय् ब्वति दुगु खः ।