था श्रेष्ठया वंशावाली

थिमि- मध्यपुर थिमिया ‘था श्रेष्ठ’ समुदायया वंशावली सफू पिहां वःगु दु । वंगु शनिवाः थनया बोडेय् जूगु छगू ज्याझ्वःया दथुइ संस्कृतिविद् तेजेश्वर बाबु ग्वंगलं ‘था श्रेष्ठया वंशावली व संस्कार’ नांया उगु सफूया पितब्वज्या यानादीगु खः ।

था श्रेष्ठ समाजया नायः सजिव श्रेष्ठया सभापतित्वय् नवासें संस्कृतिविद् ग्वंगलं पितब्वज्या जूगु सफुतिं मेमेगु जातयात नं छुं ज्या याये धइकथं तिबः बीगु जूगुलिं उगु सफू पुखुलिइ अप्पां कयेके थें जुइ धयादिल ।

मध्यपुर थिमि नगरपालिका वडा नं. ८या वडासदस्य रमेश थापां नेवाःत भचा जक ध्यबा दयेवं छुं छगू जक ज्या याःसां भ्वय् नकेगु, धलं दनेगु व मेमेगु अनावश्यक ज्याय् खर्च यायेगु यानाच्वंगु धासें थ्व पाय्छि मजू धयादिल ।

नेपाल राष्ट्र बैंकया पुलांम्ह डेपुटी गभर्नर शिवराज श्रेष्ठं सफुतिइ दुथ्यानाच्वंगु विषययात कयाः जानकारी बियादीगु ज्याझ्वलय् आदर्श मा. वि. थिमि लाय्कूया प्रधानाध्यापक बुद्धिकुमार घो, बोडे कर्मचारी कोषया नायः विनोद खमू व पे्रमचन्द्र अदुवां नं नुगःखँ तयादीगु खःसा पे्रम के. निडरं लसकुस यानादीगु खः ।