न्हापांगु उदाय् फुड फेस्टिभल

येँ – उदाय् समाजया ग्वसालय् न्हापांगु उदाय् फुड फेस्टिभल वंगु शनिवाः जुल । थनया शान्ति निकुञ्ज मा.वि.या प्रांगणय् जूगु ज्याझ्वःया उलेज्या उदाय समाजया नायः डा. रुपज्योति कसां यानादीगु खः ।आपालं उदासतय् सहभागिता दुगु फेस्टिभलय् सांस्कृतिक ज्याझ्वः नं न्ह्यब्वःगु खः । ज्याझ्वलय् भीम तुलाधर, पवित्र कसाः,सलिलसुन्दर तुलाधर, राजु सिख्राकार, रोशना तुलाधर, सुमिया स्थापित, लिरिशा तुलाधर व विधान तुलाधरं म्येँ न्ह्यब्वयादीगु खःसा उगु ज्याझ्वलय् मोडर्न नेवाः इंग्लिश स्कुलया मस्तय्सं मंकाः मचा हुलाप्याखं नं न्ह्यब्वःगु खः ।

फेस्टिभलय् थीथी नेवाः नसाज्वलंया परिकारया सवाः बीगु ल्याखं स्टलया नं व्यवस्था यानातःगु खःसा ज्याझ्वःयात थप मनोरञ्जन बीकथं घःचाः ब्वाकेगु, धम्प तछ्यायेगु, ममः नयेगु व भलिबल म्हितेगु थेंज्याःगु कासा नं जूगु खः ।
सांस्कृतिक ज्याझ्वलय् थःथःगु प्रस्तुति बियादीपिं कलाकारनापं थीथी कासाय् ब्वति कयाः त्याकादीपिंत सांस्कृतिक ज्याझ्वःया कजि डा. ज्ञानेन्द्ररत्न तुलाधरं मतिनाया चिं व फेस्टिभलया कजि उदयरत्न कसालं लुखा सिरपाः त्याकादीपिंत सिरपाः लःल्हानादीगु खः । ज्याझ्वलय् समाजया छ्यांजे स्वयम्भूरत्न तुलाधरं सुभाय् देछानादीगु खः ।