किपू १० वडाय् धिमे प्रशिक्षण

किपू(नेपालभाषा टाइम्स)- किपू नगरपालिका वडा नं. १० म्वाःन त्वालय् धिमे प्रशिक्षण न्ह्याःगु दु । म्वाःन त्वाः आखा खलःया ग्वसालय् वंगु भदौ ३१ निसें धिमे प्रशिक्षण न्ह्याःगु खः ।

धिमे प्रशिक्षणया निंतिं वंगु साउन १ गते हे नासः पुजा याःगु खः । भदौ ३१ गते बहाः पुजा यानाः धिमे प्रशिक्षण न्ह्याकूगु खःसा किपूया दकलय् तःधंगु इन्द्रायणी जात्राया इलय्् पिथनेगु ग्वसाः तयातःगु दु ।

किपू नगरपालिका १० वडाअध्यक्ष नरेश महर्जन व म्वाःन त्वाः आखा खलःया धिमे गुरु महन्त महर्जनपाखें धिमे प्रशिक्षकपिं शान्तकुमार महर्जन, हरिप्रसाद महर्जन, कविन महर्जन व राजन महर्जनयात धिमे बाजं व धिमेया बोल लःल्हासे धिमे प्रशिक्षणया उलेज्या यानादीगु खः ।

धिमे बाजंया संरक्षण, संवद्र्धनलिसें न्हू पुस्तायात धिमे बाजंप्रति आकर्षित यायेगु व पुस्तान्तरण यायेगु उद्देश्यं उगु प्रशिक्षण न्ह्याकागु बाजं प्रशिक्षणया लिउ कजि रमित महर्जनं कनादिल ।

१० वडा म्वाःन त्वालय् न्ह्यानाच्वंगु धिमे प्रशिक्षणय् मुक्कं न्यय्न्याम्ह प्रशिक्षार्थीपिंसं ब्वति कयाच्वंगु आखा खलकं जानकारी बिउगु दु ।
धिमे प्रशिक्षण बच्चुराम महर्जनया मुख्य संयोजनय् न्ह्यानाच्वंगु खः ।