फुटबल कासाय् फिल्म बन्जाःयात हन

यल(नेपालभाषा टाइम्स)- संसार क्रियसन्सया ग्वसालय् जूगु संसार कप फुटबल कासाया झ्वलय् निम्ह फिल्म बन्जाःयात हनेज्या याःगु दु । थनया खोनाय् च्वंगु ज्ञानोदय बालबाटिका स्कुलय् जूगु फुटबल कासालिसें सांगीतिक ज्याझ्वलय् उगु हनेज्या याःगु खः ।

नेपाल सरकारया चलचित्र विकास बोर्डया सल्लाहकारय् नियुक्त जुयादीम्ह नांजाःम्ह फिल्म बन्जाः गोपालकाजी कायस्थ व नेपाल चलचित्र संघया महासचिव फिल्म बन्जाः नरेन्द्र महर्जनयात हनेज्या याःगु खः ।

क्रियसन्सया कजि स्वतन्त्र संसार महर्जनया सभापतित्वय् जूगु ज्याझ्वलय् यल महानगरपालिका २१ वडाअध्यक्ष रविन्द्र महर्जनं सम्मानित व्यक्तित्वपिंत हनापौ लःल्हानादीगु खःसा संस्थाया संस्थापक पे्रमाहा महर्जनं खादा व सल्लाहकार विजयरत्न असंबरें स्वांमाः क्वखायेकादीगु खः ।

क्रियसन्सया ग्वसालय् विश्वय् दकलय् ताःहाकःगु व तःधंगु अवार्ड ज्याझ्वः दावी यानातःगु निक्वःगु नेपालभाषा स्टार म्युजिक अवार्डया प्रमोसन यायेकथं उगु फ्ुटबल कासाया ग्वसाः ग्वःगु खः । कासा लिपा जूगु सांगीतिक ज्याझ्वलय् सरस्वति मानन्धर, किशोर शाही , कल्पना श्रेष्ठ लगायतया कलाकारं थःथःगु सांगीतिक प्रस्तुति न्ह्यब्वयादीगुु खः । अथे हे वडाअध्यक्ष महर्जनं फुटबल कासाय् न्हाप, लिउ व लियांलिउ लाःगु पुचः व कलाकारपिंत दसिपौ, मेडल लःल्हानादीगु खः ।