चाबहिली दिप दयकेथाय् पंगः

न्हापा सी उइके मबिल, आः दिप दयेकेत पंगः

येँ (नेपालभाषा टाइम्स) – चाबहिली च्वंगु स्थानीय शाक्यतय्गु दिप दयेकेगु ज्या छुं न्हि लिबाइगु जूगु दु। वंगु बुधवाः येँ महानगरपालिकां दिप दयेकेगु तयारी याःगु खःसां अन पिनें वयाः दिपया जःखः बसोवास यानाच्वंपिं मनूतय्सं विरोध यायेवं दिप दयेकेगु ज्या प्रभावित जूगु खः ।

दिप दयेकेगु ज्याय् पंगः थनेवं दिपनाप स्वापू दुपिं व अन न्हूगु छेँ दनाः च्वं वःपिं मनूतय् दथुइ छझाः घ्वातुमतु घ्वानाः ल्वापु समेत जूगु खः । ल्वापु तःधनीगु अवस्था वयेवं म्हिगः वडा कार्यालयय् वार्ता यायेगु कथं ज्या स्थगित जूगु खःसा म्हिगः वडा कार्यालयय् च्वंगु बैठक लिपा आः स्वन्हुया नितिं दिप दयेकेगु ज्या स्थगित जूगु खँ वडाया दुजः कृष्णप्रसाद घिमिरें ‘नेपालभाषा टाइम्स’ यात कनादिल ।

वय्कःया कथं वइगु सोमवाः दिप दयेकेगु ज्या न्ह्याइगु खनेदु। ‘छेँ दनेबलय् जःलाखःला दथुइ हे कचवं जुयाः छेँ दनेगु ज्या छन्हु निन्हु लिबाइगु स्वभाविक खः । आः नं अथे हे जक जूगु खः, वइगु सोमवाःनिसें दिप दयेकेगु ज्या न्ह्याइ, अबलय् प्रहरीं नं माःगु सुरक्षा बीगु खँ धाःगु दु’ घिमिरें कनादिल ।

येँ महानगरपालिकां नक्सा पास यानाः हे उगु दिप दयेकेगु ज्या शुरु जूगु खँ वडाध्यक्ष शुद्ध डंगोलं कनादिल । येँ महानगरपालिकाया हे बजेटं दिप दयेकेगु ज्या जुयाच्वंगु खँ कँसें वडाध्यक्ष डंगोलं थः विरामी जुयाः छेँय् च्वंच्वनागुलिं दिप दयेकेगु ज्याय् पंगः वःगु व प्रहरीं नं पंगः थं वःपिंत पनेगु ज्या मयाःगुलिं समस्या वःगु खँ कनादिल ।

न्हापा खुसि जुयाच्वंगु उगु थासय् लिपा छेँ न्यानाः च्वं वःपिं मनूतय्सं दिप दयेकेगु ज्याय् पंगः थंगु खँ स्थानीय वासिन्दा जलदराज वैद्यं कनादिल । थ्व सिबें न्ह्यः नं उगु दिपय् निक्वः तक सी उइगु ज्याय् पंगः थंगु खःसा अबलय् प्रहरी पाः तयाः सी उइमाःगु खः ।  अबलय् सी उइगु ज्याय् पंगः थंवःपिंत स्वनिगःया अभियन्तात वनाः प्रतिकार यायेमाःगु खः ।

आः उगु दिप बांलाक दयेकेगु ज्या न्ह्यायेवं वहे पिनें वयाः च्वं वःपिं मनूतय्सं पंगः थं वःगु खः । थुकिया विरोधय् नं स्वनिगःया अभियन्तातय्सं प्रतिकार याः वंगु खः ।

सम्बन्धित बुखँ

LEAVE YOUR COMMENTS