‘ह्यूमन कम्पोस्टिङ’यात न्यूयोर्कय् मान्यता

एजेन्सी- संयुक्त राज्य अमेरिकाया न्यूयोर्कय् मनूया सीम्ह ध्वगीका प्राङ्गारिक मल दयेकीगु विधि ‘ह्यूमन कम्पोस्टिङ’यात वैधानिक मान्यता बिउगु दु । आः मनू सीगु छुं ईलिपा न्यूयोर्कय् मनूया म्हयात चा दयेके फइगु जुइ । मनू सीधुंकाः सीम्हेसित ल्हानाछ्वयेगु वा च्याकाछ्वयेगु सिबें थ्व विधि पार्यवरणीय दृष्टिकोणं उपयुक्त खनेदुगु धाःगु दु ।

थ्व विधियात नेचुरल अग्र्यानिक रिडक्सन अर्थात प्राकृतिक प्राङ्गारिक अपचयन धाइ । थ्व प्रविधिकथं छगू पुसा तिनातःगु थलय् मनूया सीम्ह तयाः ध्वगीकेगु याइ । सन् २०१९ य् अमेरिकाया वाशिङ्टनय् थ्व विधियात कानूनी मान्यता बिउगु खःसा व धुंकाः कोलराडो, ओरिगन, भर्भोन्ट व क्यालिफोर्नियाय् नं मान्यता बिउगु खः ।

‘ह्यूमन कम्पोस्टिङ’ दयेकीबलय् सिँया कुचा, घाँय् व सु तयाः सीम्ह मनूया म्हयात छगू प्वाः तिनातःगु थलय् तइ । थ्वयां छुं ई लिपा सुक्ष्मजीवतय्सं म्हयात ध्वगिका यंकी । लत्यालिपा कीटाणु निष्क्रिय यायेत ल्यंदनिगु पदार्थ क्वाकी । वं धुंकाः सीम्ह चा जुइ । थ्व चा सीम्हेसिया छेँजःपित बिइ । अमेरिकाया रिकम्पोज नांयागु कम्पनीया कथं पराम्परागत कथं दाहसंस्कार याइबलय् सिबें थ्व विधिं छगू टन अप्वः कार्बन बचे याइ । जलवायु परिवर्तनय् कार्बन डाइअक्साइडया मू भूमिका दु । मेगु फाइदा धयागु सीम्ह ल्हायेत सीमित थाय् जक दःसां गाइ ।

थुकियात मान्यता बिउसां न्यूयोर्कया छुं क्याथोलिक विशपतय्सं धाःसा थुकिया विरोध यानाच्वंगु दु । थ्व विधि यायेत ७००० डलर तू वः । अमेरिकी नेशनल फ्युनरल एसोसियनकथं सन् २०२१ य् अन्तिम संस्कार यायेगु औसत खर्च ७८४८ तूगु खःसा विद्युतीय दाहसंस्कार यायेत ६९७१ डलर तूगु खः ।