युक्रेन संकटया कूटनीतिक समाधानया आश दनि – अमेरिका–बेलायत

एजेन्सी- अमेरिका व बेलायतया नेतातय्सं युक्रेन संकटया कूटनीतिक समाधानया नितिं अझं आशा दनिगु खँ धाःगु दु । लिसें उमिसं रुस व युक्रेन दथुया स्वापू तसकं बांमलायेधुंकूगु नं धाःगु दु । रुसं युक्रेनय् आक्रमण याइगु ख्याच्वःया दथुइ अमेरिकाया राष्ट्रपति जो बाइडेन व बेलायतया प्रधानमन्त्री बोरिस जोनसन दथुइ जूगु ४० मिनेट ताःहाकःगु फोनवार्ताय् निम्हं नेतात सम्झौताया सम्भावना अझं दनिगु खँय् सहमत जूगु खः ।

बेलायतया प्रधानमन्त्री बोरिस जोनसनं बाइडेनलिसे जानाः थ्व संकटय् ग्वाहालि यायेत थःपिं तयार दुगु धाःगु खःसा अमेरिकी राष्ट्रपति बाइडेनं बेलायतया ग्वाहालि मकासें थःपिंसं छुं नं मयाःगु बचं बिउगु खः ।

थ्वहे दथुइ अमेरिकाया विदेशमन्त्री एन्थोनी ब्लिङ्कनं युक्रेनयात छगू बिलियन अमेरिकी डलर ग्वाहालि यायेगु घोषणा यायेधुंकूगु दु ।
थुखे रुसया विदेशमन्त्री सर्गेइ ल्याभरोभं नं कूटनीतिक वार्ता यानाः युक्रेन संकटया सामाधान यायेत तयार दुगु खँ धाःगु दु । अथेहे क्रेमिलिनया प्रवक्ता दिमित्री पेस्कोभले नं थुगु समस्यायात कयाः पश्चिमी देय्तलिसे वार्ता यायेत रुस तयार दुगु व थःपिंसं याकनं हे सैन्य अभ्यास क्वचायेके त्यनागु खँ धाःगु दु ।

राष्ट्रसंघया महासचिव एन्टोनियो गुटरेसं नं युक्रेन संकटयात वार्तां ज्यंकेमाःगु खँय् बः बिउगु दु । थ्व हे झ्वलय् युक्रेनया राष्ट्रपति जेलेस्कीं युक्रेनय् आक्रमण जुइफुगु न्हि धकाः अमेरिकां धयातःगु न्हि फेब्रुअरी १६ तारिख कुन्हु एकता दिवस न्याकेत्यंगु दु । राष्ट्रपति जेलेस्कीं राष्ट्रया नामय् सम्बोधन यासें थुकिया जानकारी बिउगु खःसा समाजिक सञ्जाल मार्फत नं थुकिया जानकारी बिउगु खः ।

अमेरिकालिसें छगू दर्जनं मल्याकं देशं थः नागरिक व कूटनीतिक अधिकारीतय्त युक्रेन त्वःतेत धायेधुंकूगु दु । भारतं नं मंगलवाः छगू वक्तव्य पिकयाः युक्रेनय् च्वनाच्वंपिं थः नागरिकतय्त युक्रेन त्वःतेत आह्वान याःगु दु ।