फ्रान्सया राष्ट्रपतियात सार्वजनिक थासय् थप्पड नकल

एजेन्सी- फ्रान्सया राष्ट्रपति इमानुएल म्याक्रोंयात दक्षिणपूर्वी क्षेत्रय् भ्रमण यानाच्वंगु इलय् सार्वजनिक थासय् हे न्यतालय् दाःगु खः । सामाजिक सञ्जालय् भाइरल जूगु छगू भिडियोय् भ्यालेन्स शहरया पिने भ्रमण यानाच्वंगु इलय् राष्ट्रपति म्याक्रों सुरक्षा बार तयातःथाय् च्वनाः मनूतय्त नापलानाच्वंगु इलय् छम्ह मिजंम्हेसिनं थप्पड नकूगु खः । ह्याउँगु टिसर्ट फिनातःम्ह उम्ह मिजनं थप्पड नकेवं सुरक्षाकर्मीतय्सं राष्ट्रपतियात सालायंकूगु भिडियोय् खनेदुगु दु । सुरक्षाकर्मीतय्सं साला यंकूसां छुं ई लिपा हे म्याक्रों हानं अन हे वयाः मनूतय्त नापलानाच्वंगु मेगु भिडियाये खनेदुगु खः ।

फ्रान्सया सञ्चार माध्यमतय्सं थ्व घटना लिपा निम्ह मिजंतय्त प्रहरीं ज्वंगु खँ धाःगु दु । थ्व घटनायात कयाः राष्ट्रपति म्याक्रों असामान्य घटना धकाः धाःगु दु । वय्कलं थ्व घटना राजनीतिक वातावरण स्यनाः जूगु खँयात नं अस्वीकार यानादीगु दु ।

थ्व घटनायात कयाः म्याक्रों समर्थक व विपक्षी सकसिनं आक्रोस प्वंकूगु दु । मेगु दँय् म्याक्रों विरुद्ध चुनाव ल्वायेगु तयारी यानाच्वंम्ह लोकप्रिय नेतृ मारिन ल पेनं नं राष्ट्रपतिविरुद्ध जूगु हिंसा स्वीकार यायेफइमखु धाःगु दु ।

राष्ट्रपतियात थप्पड नकूम्ह मिजनं उबलय् ‘मोँजुवा सान्ट डेनी’ धकाः नारा थ्वयेकूगु खः । थ्व नारा फ्रान्सेली इतिहासय् जुजु शार्लामेनया इलय् थ्वयेकूगु खः । तर थप्पड नकूम्ह मिजंया सु खः धयागु सार्वजनिक याःगु मदुनिसा वं छु नियतं थप्पड नकू धकाः नं सीमदुनि धाःगु दु ।