थौं पोखराय् शंखधरया झ्वाता उलेज्या

येँ- थुगुसी नेपाल संवत् ११४२ न्हूदँया लसताय् पोखराय् शंखधर साख्वाःया झ्वाता तइगु जूगु दु । थौं न्हूदँ कुन्हु पोखराया वीरेन्द्र स्मृति पार्क दुने पलिस्था याःगु शंखधर साख्वाःया झ्वाता उलेज्या यायेत्यंगु खः । थौं छगू ज्याझ्वःया दथुइ गण्डकी प्रदेश मुख्यमन्त्री कृष्णभक्त पोखरेलं शंखधरया झ्वाता उलेज्या याइगु ग्वसाः दु ।

पोखराय् पलिस्था जुइत्यंगु थ्व झ्वाता शंखधर साख्वाःया २२ औं झ्वाता खः । राष्ट्रिय विभूति शंखधर साख्वाः प्रतिष्ठानं आः तक मुंकातःगु तथ्यांक कथं पोखराया थ्व झ्वाता नापं यानाः आः देय्न्यंकं शंखधरया २२ गू झ्वाता धस्वायेधुंकूगु दु । शंखधर साख्वाःया न्हापांगु झ्वाता थिमिइ धस्वाकूगु खः । उगु झ्वाता धस्वाकेधुंकाः उगु थाय्या नां हे ‘शंखधर चोक’ जूवंगु खः ।

येँ महानगरपालिकापाखें थगुने थनया पुलांगु रत्नपार्कय् शंखधर साख्वाःया पूर्ण कदया झ्वाता पलिस्था याःगु खः । शंखधरया पूर्ण कद दुगु थ्वहे न्हापांगु झ्वाता खः । पुलांगु रत्नपार्कयात छुं दँ न्ह्यःहे सरकारं ‘शंखधर उद्यान’ धकाः नां तःगु खःसा महानगरपालिकां उगु हे उद्यान दुने शंखधरया झ्वाता तःगु खः ।

शंखधर साख्वाःया थीथी आकारया झ्वाता विराटनगर, वीरगंज, हेटौंडा, बागलुङ, दोलखा, झापा, वुटवल आदि जिल्लाय् धस्वाकेधुंकूगु दु । छुं नं जिल्लाय् शंखधरया झ्वाता धस्वाकीगु जुल धाःसा शंखधर प्रतिष्ठानं निःशुल्क झ्वाता बीगु यानाच्वंगु दु ।