सिद्धिदासया बुन्हिया लसताय् छन्द चिनाखँ वाचन धेंधेंबल्लाः

येँ – महाकवि सिद्धिदास महाजुया १५२ क्वःगु बुन्हिया लसताय् लाकाः नेपालभाषा छन्द चिनाखँ धेंधेंबल्लाः कासा जुल । नेवाः क्यबपाखें ग्वसाः ग्वःगु उगु छन्द चिनाखँ कासा जगतसुन्दर ब्वनेकुथिइ जूगु खः । मस्तय् निंतिं नेपालभाषा गतिविधि न्ह्यब्वयेगु तातुनाः जूगु कासाय् मुक्कं झिंछगू ब्वनेकुथिया विद्यार्थीतय् सहभागिता दुगु खः ।

कासाय् हिमालय मा.वि.या शिवानी श्रेष्ठ, जनप्रभात मा.वि.या रेश्मा मगर खड्गी व मंगल मा.वि.या सुजना महर्जन छसिकथं न्हाप, लिउ व लियांलिउ जुयादीगु खः । कासाय् सहभागि विद्यार्थीतय्सं महाकवि सिद्धिदास महाजु, जनकवि दुर्गालाल श्रेष्ठ, गजलकार भूषणप्रसाद श्रेष्ठ लगायतया च्वमिपिनिगु चिनाखँयात छन्दवद्ध रुपं वाचन याःगु खः ।

नेवाः क्यबया नायः दर्शनवीर शाक्यया सभापतित्वय् जूगु ज्याझ्वलय् सल्लाहकारपिं नरेशवीर शाक्य, दीपक तुलाधर व राजेन्द्र महर्जन लगायतयापिनिगु उपस्थिति दुगु खः । संस्थाया न्वकु सुनिता मानन्धरं लसकुस यानादीगु ज्याझ्वलय छ्याञ्जे सुमित्रा महर्जनं परमानन्द वज्राचार्यं च्वयादीगु महाकवि सिद्धिदासया नसंचा म्येँ हालाः न्यंकादीगु खः ।

कासाय् विजयी जुयादीपिं पदकलिसें नगद सिरपाः व ब्वति कयादीपिं सकसितं नं नगद सिरपाः लःल्हाःगु खः । कासा स्वयां न्ह्यः छन्द चिनाखँ वाचनया विषयय् साहित्यकार भूषणप्रसाद श्रेष्ठं प्रशिक्षण बियादीगु खः ।