स्वनिगः मखु मेगू सहरय् वनेगु वातावरणा दयेकेमाः : मानन्धर
किपू – स्वनिगःया दक्वं स्थानीय तह व काभ्रे जिल्लाया नगरपालिकाया मेयर दुथ्याःगु उपत्यका मेयर फोरमया बैठक वंगु वालय् च्वन ।
संघीय सरकारया सहरी विकास राज्यमन्त्री रामवीर मानन्धरं त्वाःदेवाय् मत च्याकाः उलेज्या यानादीगु बैठकय् नवासें वय्कलं स्वनिगःयात व्यवस्थित सहरया रुपय् विकास यायेत येँ दुने न्हूगु रिंगरोड दयेकेगु स्वयां नं ख्वना, गल्छी, तोखा, चाँगु, सक्व लगायत थीथी थासय् सुरुब मार्ग (टनेल) चायेकाः स्वनिगलं पिहां वनेगु वैकल्पिक लँपु दयेकेमाःगु खँय् बः बियादिल ।
स्वनिगः तसकं चिकुसे नं मच्वनीगु व अपाय्सकं तांन्वः नं मजुइगु थाय् जूगुलिं देय्या थीथी थासय् च्वंपिं मनूत थन हे च्वनेत ययेकीगु व आः स्वनिगलं अप्वः जनघनत्व कःघाये फइगु अवस्था मदुगुलिं येँ दुहां वयेत स्वइपिंत मेगु हे सहरय् वनेगु वातावरण दयेकेमाः धयादिल ।
बैठकया अध्यक्षता यासें किपू नगरपालिकाया प्रमुख रमेश महर्जनं स्वनिगःया ऐतिहासिक सम्पदाया संरक्षण यायेत तसकं समस्या दुगु खँ कुलादिसें पुरातत्व लगायत मेमेगु निकायया समन्वयया अभाव व थःथःगु हे मापदण्ड दुगु व स्थानीय तहया नं थःगु कथं मापदण्ड दयेकाच्वंगुलिं ऐतिहासिक सम्पदा संरक्षण यायेत समस्या जुयाच्वंगु धयादिल ।
‘स्वनिगःया निगू महानगरपालिकासहित झिंच्यागू नगरपालिका व काभ्रेया स्वंगू नगरपालिका दक्वं हे सम्पदां युक्त वस्ती जूगुलिं सकसिगं थःथःगु हे बिस्कं बिस्कं मापदण्ड दु’ नगरप्रमुख महर्जनं धयादिल, ‘आः थुपिं दक्वं स्थानीय तहया मापदण्ड छगू हे दयेकाः एकीकृत रुपय् मवनेगु खःसा थनया सम्पदात वइगु २०-२५ दँ लिपा इतिहासया पानाय् जक लिकुनाच्वनी ।’
स्वनिगःया १८ गू व काभ्रेया स्वंगू यानाः २१ गू नगरपालिकाया प्रमुख उपप्रमुख दुथ्याःगु उपत्यका मेयर फोरमया न्हापांगु बैठक पन्तिइ च्वंगु खःसा यलय् च्वंगु निगूगु बैठकया जानकारीसहितया घोषणापत्र मूपाहां राज्यमन्त्री मानन्धर, किपू नपाया प्रमुख महर्जन, यल महानगरपालिका प्रमुख चिरिबाबु महर्जन, ख्वप इन्जिनियरिंग कलेजया डा. विजयकुमार श्रेष्ठं मंकाःकथं सार्वजनिक यानादीगु खः ।
LEAVE YOUR COMMENTS