ने. सं. ११४४ कछलागा द्वादशी -

तःधंगु भ्वय् मयायेत इनाप

येँ – कोरोना भाइरस न्यना वनेफुगु मेगु देश नेपाः नं जुइफु धकाः विश्व स्वास्थ्य संगठनं सचेत याःगुयां निन्हु लिपा हे येँय् निम्ह मिजंतय्त कोरोना संक्रमणया आशंका यासें टेकु अस्पतालया आइसोलेसन वार्डय् भर्ना याःगु दु । थुपिं सेखं चायाच्वंगु व ज्वरो नं वःगु धकाः म्हिगः टेकुया सरुवा रोग अस्पतालय् क्यं वःगु खःसा अस्पतालं तुरुन्त हे उमिगु नमूना कयाः आइसोलेसन वार्डय् भर्ना याःगु खः । उमित धाथें कोरोना जूगु खः लाकि मखु धइगु खँ धाःसा थौं उमिगु रिपोर्ट स्वयेधुंकाः जक धाये फइगु खँ अस्पतालं धाःगु दु ।

अन भर्ना याःपिं थ्व निम्हं नेपाःमित विदेशं नेपाः लिहां वःपिं खः । छम्ह चीनं लिहां वःम्ह खःसा मेम्ह दक्षिण कोरियां लिहां वःम्ह खः । कोरियां लिहां वःम्ह नेपाःमियात आइसोलेशनय् तःगु थ्व न्हापांगु घटना खः । उपिं चीन व कोरियां लिहां वःपिं जूगुलिं नं अस्पतालं तुरुन्त हे आइसोलेशनय् तःगु खः । उपिं विदेशं लिहां वयाः सरासर थःगु छेँय् हे वनेधुंकूपिं खः । छेँय् थ्यंकाः ज्वरो वःगु थें च्वनाः अस्पतालय् क्यं वःगु खँ अस्पताल सूत्रं धाःगु दु ।

थ्वहे झ्वलय् भाइरसया संक्रमण जुइगु सम्भावनायात ध्यानय् तयाः आः गनं नं यक्व मनूत सःताः छुं नं कथंया सभा समारोह मयायेगु लागिं सरकारं इनाप याःगु दु । स्वास्थ्यमन्त्री भानुभक्त ढकालं म्हिगः छगू पत्रकार सम्मेलन यासें सर्वसाधारणयात अज्याःगु इनाप यानादीगु खः । हुलमुलय् कोरोना न्यना वनीगु सम्भावना यक्व दुगुलिं हुल मुंकाः छुं नं समारोह, भ्वय् आदि समेत मयायेत इनाप यानादीगु खः ।
लिसें आः त्रिभुवन अन्तर्राष्ट्रिय विमानस्थलय् नं थप उपकरण हयाः कोरोना जाँच यायेगु तयारी जुयाच्वंगु खँ वय्कलं कनादिल । विदेशं वइपिं नेपाःमित बांलाक चेक जाँच तकं मयासे अनं छेँय् लिहां वना वनाच्वंगु खने दयेवं सरकारं विमानस्थलय् कोरोना जाँचयात कडा यायेत्यंगु खः ।