फ्रान्सय् स्वांयाःपुन्हि

येँ(नेपालभाषा टाइम्स)- पश्चिमी युरोपेली राष्ट्र फ्रान्सय् नं २५६७ क्वःगु स्वांयाःपुन्हि तःजिक हंगु दु । बुद्धिष्ट युनियन अफ फ्रान्सया ग्वसालय् छवाःयंकं थीथी ज्याझ्वः यासें स्वांयाःपुन्हि हंगु खः ।

राजधानी पेरिसय् च्वंगु थीथी बौद्ध विहारय् बौद्ध धर्मावलम्बितय्सं थेरवाद व महायान परम्पराकथं बुद्ध वन्दना, बुद्ध पुजा, सुत्तपाठ आदि थीथी ज्याझ्वः यानाः स्वांयाःपुन्हि अर्थात बैशाख डे हंगु खः । उगु इलय् तथागत भगवान बुद्धया अस्थिधातुया ब्वज्या तकं याःगु खः ।

राजधानी पेरिसया भिन्सेनीलिसें मेमेगु सहरय् च्वंपिं बौद्ध धर्मावलम्बिलिसें छवाःयंकं थीथी ज्याझ्वःया यानाः स्वांयाःपुन्हि हंगु खः । उगु इलय फ्रान्स सरकारय मन्त्रीतय् नं सहभागिता दुगु खः ।

फ्रान्सय् स्वांयाःपुन्हि बाहेकं अन च्वंपिं बौद्ध धर्मावलम्बितय्सं बैशाख अस्तमि पुजा नं हनेगु याना वयाच्वंगु दु । वसपोल तथागत भगवान बुद्धया अन्तिम संस्कार जूगु तिथिया ल्याखं अस्तमिया दिंकुन्हु अस्तमि पुजा यायेगु याना वयाच्वंगु खः ।

स्वांयाःपुन्हिया हे दिंकुन्हु संयुक्त राष्ट्र संघं बैशाख डे धकाः हना वयाच्वंगु दुसा थ्वकुन्हु राष्ट्र संघं थःगु मुख्यालयलिसें दक्वं निकायय् सार्वजनिक विदा नं बिया वयाच्वंगु दु ।