थुगुसी तलेजुया देगः सर्वसाधारणयात चायेकीगु
येँ – कोरोना महामारीया कारणं थगुने मचायेकूगु तलेजुया देगः कन्हय् नवमि कुन्हु धाःसा चायेकीगु दु । थुगुसी कोरोनाया महामारी म्हो जुया वंगु कारणं कन्हय् तलेजु भवानीया देगः सर्वसाधारणयात लागिं चायेकेगु निर्णय जूगु खः ।
तलेजुया देगः मोहनिया महानवमि कुन्हु छन्हु जक सर्वसाधारणया लागिं चायेकीगु खः । थगुने कोरोना महामारी तच्वःगु देगः मचायेकूगु खः । थुगुसी कोरोना महामारी यक्व हद तक म्हो जुया वंगु लिसें स्वनिगःया आपालं मनूतय्सं कोरोना विरुद्धया खोप नं कायेधुंकूगु जूगुलिं देगः चायेकूसां जिउगु निर्णय याःगु खँ हनुमानढोका दरबार हेरचाह अड्डाया प्रमुख सन्दिप खनालं कनादीगु दु ।
दँय्दसं महानवमीका कुन्हु तलेजु भवानीया दर्शन यायेत हनुमानध्वाखा दरबार क्षेत्रय् भक्तजनतय् लाइन जुयाच्वंगु दइ ।
थ्वहे झ्वलय् तुलजा भवानीयात म्हिगः नेपाल पञ्चाङ्ग निर्णायक समितिं बिउगु साइत कथं हनुमानध्वाखा दरबार क्षेत्रया मूलचुकय् बिज्याकूगु दु । तुलजा भवानीयात म्हिगः सुथय् ८ः४४ बजेया साइतय् स्थिरासनय् बिज्याकूगु खः ।
तलेजु भवानीयात मूचुकय् तयाः महाअष्टमीया चान्हय् कालरात्रि पूजाया लिसें ५४ म्ह दुगु व ५४ म्ह म्येय् बलि बियाः आराधना याइगु परम्परा दु ।
लिसें म्हिगः हे गोरखा दरवारं शाह वंशीय जुजुपिनि पूmलपाती नं येँय् हयेगु ज्या जुल । जुजु पृथ्वीनारायण शाहं येँ देय्् त्याकेधुंकाः थःगु कुलछेँया स्वां हयाः येँय् स्वनेगु चलन याःगु खः । न्हापा न्हापा गोरखांनिसें फूलपाती न्यासि हे वयाः तः वइगु खःसां २०६६ सालंनिसें धाःसा गोरखां निसें सरकारी गाडी तयाः येँय् हयेगु चलन शुरु जूगु दु । म्हिगः नं गाडीइ हे तयाः स्वां हःगु खः ।
LEAVE YOUR COMMENTS