निगू कोरियाली नेतातय् आकस्मिक भेटवार्ता

एजेन्सी- अमेरिकी राष्ट्रपति डोनाल्ड ट्रम्पं उत्तर कोरियाली नेता किम जङ अनलिसेया शिखर वार्ता क्वःथलेधुंकाः शनिवाः आकाझाकां उत्तर कोरियाली नेता व दक्षिण कोरियाली राष्ट्रपति दथुइ भेटवार्ता जूगु दु ।

निगू कोरियाली देय्या नेतातय् दथुइ थ्व भेटवार्ता जूगु वंगु प्यवाः दुने निक्वःखुसी खः । निम्ह नेता दथुइ शिखर वार्तायात हे कयाः खँल्हाबल्हा जूगु खँ धाःगु दु । अमेरिकी राष्ट्रपतिं थःम्हं वार्ता क्वःथलेधुंकाः नं हाकनं वार्ता जुइगु सम्भावना दनी धाःगुयां कन्हय् कुन्हु हे निम्ह कोरियाली नेतात नापलाःगु खः ।

निगू कोरियाया सीमा क्षेत्रय् लाःगु सैन्य गतविधि प्रतिबन्ध तयातःगु क्षेत्रय् शनिवाः आकाझाकां निम्ह नेतातय् दथुइ बैठक जूगु खः । कोरियाली प्रायद्वीपय् जुयाच्वंगु दक्षिण कोरिया व अमेरिकी सेनाया मंकाः सैन्य अभ्यासयात कयाः थ्वयां न्ह्यव उत्तर कोरियां दक्षिणया प्रतिनिधिलिसे खँ ल्हायेत तकं अस्वीकार याना वयाच्वंगु खः ।

दक्षिण कोरियाली राष्ट्रपति मून जे इनयात उत्तर कोरियाली नेता किमं नापलाःगु धयागु उत्तर कोरिया अझं राष्ट्रपति ट्रम्पलिसे नापलायेत इच्छु दुगु संकेत याःगु खँ विश्लेषकतय्सं धाःगु दु । कोरियाली नेतातय् वार्तां निगू कोरिया सहकार्य यानाः न्ह्याःवनेगु कुतःया संकेत नं जूगु खँ धाःगु दु ।