पत्रकार जुइत नं जाँच कायेमाःगु प्रस्ताव

येँ – पत्रकार जुइत नं आः जाँच बीमाःगु जूगु दु । म्हीग आइतवाः सत्तारुढ दल नेकपाया झिंप्यम्ह राष्ट्रियसभा सांसदतय्सं संसद सचिवालयय् दर्ता याःगु संशोधन प्रस्तावय् पत्रकारिता पेशाय् वइपिंसं जाँच बीमाःगु खँ न्ह्यथनातःगु दु । पत्रकारिता व्यवसायी परीक्षा धाइगु थज्याःगु
परीक्षा मिडिया काउन्सिल अन्तर्गत कायेमाःगु खँ उकी धयातःगु दु ।

काउन्सिलं दँय् निक्वः पत्रकारिता पेशाय् दुहां वयेगु निंतिं परीक्षा काइगु व उकिया निंतिं पाठ्यक्रम नं काउन्सिलं तयार यायेगु कथं संशोधन प्रस्तावय् सुझाव न्ह्यथनातःगु दु । संशोधन प्रस्तावय् न्ह्यथनातःगु दु, ‘प्रेस काउन्सिलं पत्रकारिता व्यवसायी परीक्षाया पाठ्यक्रम, स्तर व प्रणाली क्वःछी । थ्व सम्बन्धी पत्रकारिता विषयया अध्ययन अध्यापन शैक्षिक संस्थातय्सं माःगु ग्वाहालि काउन्सिलं काइ ।’

पत्रकार जुइम्ह व्यक्तिं मौखिक व लिखित निगुलिं परीक्षा बीमाःगु खँ संशोधनय् न्ह्यथनातःगु दु । पत्रकारया रुपय् दर्ता जुइत पत्रकारिता विषयसं स्नातक पास जुइमाःगु वा मेगु छुं विषयसं स्नातक याःगु खःसा स्वदँ पत्रकारिताय् ज्या याःगु जुइमाःगु वा निरन्तर सञ्चार प्रतिनिधि जुयाः न्यादँ ज्या याःगु जुइमाःगु खँ नं उकी धयातःगु दु ।

वयां लिपा उमिसं पत्रकारिता व्यवसाय उत्तीर्ण जुइमाःगु व नैतिक पतन खने दइगु फौजदारी अभियोगय् सजायँ जूम्ह जुइ मजिउगु प्रावधान विधेकयया संशोधन प्रस्तावय् न्ह्यथनातःगु दु ।