विपश्यना ध्यान छगू आकर्षण

‘वि’ अर्थात विशेष तवरं अले ‘पश्यना’ अर्थात दृष्टिगोचर । विशेष तवरं याःगु दृष्टिगोचर अर्थात ध्यान भावनायात हे विपश्यना धाइगु खः । विपश्यना थःगु शरीरयात तन्दुरुस्त, स्वस्थ व निरोगी याना तयेया निंतिं योग–ध्यान शिविर, कसरत व्यायाम याइपिं अप्वया वःथें लिपांगु इलय् थःगु मनयात विकारमुक्त यानाः सुख व शान्तिया अनुभूत याये मंदुपिं थुगु ध्यानपाखे आकर्षित जुया वनाच्वंगु दु ।शील, समाधि व प्रज्ञायात थुइकेत व थःगु नुगः दुनेया राग, द्वेष, क्लेश, मोहयात चिइकाः चित्त शुद्ध व निर्मल यायेत विपश्यना ध्यान अतिकं उत्तम जूगु थुगु ध्यानय् वनाच्वंपिनिगु धापू दु । मौन व्रत च्वनाः उकिसनं १७ घन्टा तक ध्यान यायेमाःगु झिन्हुया थ्व कठिन साधनाय् वनेत उमेरं पनी मखु धइगु छगू ज्वलन्त उदाहरण खः श्रीमहालक्ष्मी नगरपालिका वडा नं. ७ सानागाउँ निवासी ८२ दँ दुम्ह धनबहादुर महर्जन ।

झिंनिक्वःतक विपश्यना ध्यानय् च्वनादी धुंकूम्ह महर्जनयात विपश्यना ध्यान केन्द्र धर्मश्रृंग वनेगु मोहं धाःसा आतकं त्वःतूगु मदुनि । थज्याःगु ज्याथगु उमेरय् उकिसनं अतिकं कठिन साधना यायेमाःगु विपश्यना ध्यानय् मवनेत वय्कःया छेँजःपिं व जःलाखःलां सुझाव बिउसां वय्कःया मन धाःसा माने जुयाच्वंगु मदु । भुइजःसिइ च्वंगु विपश्यना ध्यान केन्द्र धर्मश्रृंग वनाः लिपांगु इलय् सम्पन्न जूगु शिविरय् नं वय्कः साधक जुयादिल । गाक्क व त्यंक नये मखनीगु जक मखु बांलाक द्यने तकं मखनीगु जूगुलिं विपश्यना ध्यान यक्वसिगु निंतिं अतिक कठिन व दुष्कर साधना खः ।वैंश वनेधुंकूगु उकिसनं ज्याथगु उमेर अले मुस्किल बाघौ ला छु १५–२० मिनेट जक दनाच्वनेत तकं थाकुसां स्वस्थ व च्याःगु ख्वाः स्वयेबलय् व वय्कःया खँ न्यनेबलय् विपश्यनाया हे कारणं वय्कः नच्चा ल्याय्म्हया थें स्वस्थ व निरोगी खने दुगु महसुस यायेफु । अप्वःथें एकादशि व सिलाचः¥हेया इलय् पशुपतिइ वनाः दर्शन यानादीम्ह वय्कःया सेल मार्पायात प्रसादया रुपय् नयेगु बानी दु ।

जीवनया उत्तराद्र्धय् वयाः विपश्यनाय् प्रभावित जुयादीम्ह वय्कः थःत बुद्धया अनुयायीया रुपय् म्हसीके यः ।प्यक्वःतक थीथी चरणय् विपश्यना ध्यानय् च्वना बिज्याये धुंकूम्ह अमेरिकाया टेक्सास राज्यया भिक्षु यु सारियां नं भगवान बुद्धया जन्मभूमि नेपालय् वयाः छक्वः जक जूसां विपश्यना ध्यान च्वनेगु थःगु इच्छा व चाहना पूवंगु जक मखु ध्यानय् च्वनाः तसकं आनन्द व हर्षविभोर जुयादिल । अमेरिकाय् वनाः थाइल्याण्डया शरणार्थीतय्त ग्वाहालि याना वयाच्वंगु छगू गैरसरकारी संस्थाय् गुगुं छगू इलय् ज्या यानादी धुंकूम्ह वय्कलं इपिं शरणार्थीतय्सं दयेकूगु बौद्ध चैत्य व इमिगु जीवनशैलीपाखें प्रभावित जुयाः हे थः नं बौद्ध भिक्षु जुइगु विचाः वःगु वसपोलं कनादीगु दु ।थुकथं हे छेँजःपिं सुयात नं छुं जानकारीतकं मबिसे थनिं निदँ न्ह्यः श्रीलंका वनाः भिक्षु जुयादीम्ह २६ दँ दुम्ह जापानी भिक्षु दाइकी नं नेपालय् विपश्यना ध्यान शिविर जुइ धइगु न्यनागु ला खः, तर न्हापांखुसी नेपाः वयाः विपश्यना ध्यान शिविरय् च्वने खंगुलिं अतिकं लय्ताःगु धयादिल । थःगु लँपु थम्हं हे ल्ययेमाः धइगु मान्यता तयादीम्ह वय्कलं धयादी, ‘विपश्यना ध्यानपाखें आपालं समस्याया समाधान माले फइगु जुयाच्वन । उकिं थ्व ध्यानया बारे खँ जक ल्हायेगु स्वयां नं निरन्तर रुपं अभ्यास यायेगु तसकं बांलाः ।’

बौद्ध समुदायजक मखु, हिन्दू, मुस्लिम, जैन, शिख, इसाई आदि दक्वं धर्म व सम्प्रदायया दथुइ थौंकन्हय् विपश्यना ध्यानप्रति आकर्षण अप्वया वनाच्वंगु दु । श्रीलंका, म्यानमार, थाइल्याण्ड, अमेरिका, इजरायल लगायतया देशय् तकं विपश्यनाया थीथी चरणया ध्यान शिविर संचालन जुया वयाच्वंगु दु । अथे खःसां बुद्ध जन्मभूमि जूगुलिं खयेमाः नेपाःया राजधानी येँया भुइजःसिइ च्वंगु धर्मश्रृंग लगायतया थासय् विश्वया थीथी देशं आपालं विपश्यना साधकत ध्यान यायेत वयेगु यानाच्वंगु दु ।
विश्वय् धर्मया हे नामय् इलय्व्यलय् ब्वलनाच्वनीगु सामाजिक विग्रह, धार्मिक द्वन्द्व, युद्ध थेंज्याःगु विध्वंसात्मक घटनात जुयाच्वनीगु इलय् थज्याःगु घटनां वाक्कदिक्क जुयाः सतमार्गया लँपु मालेगु नापं चित्त शुद्ध, निर्मल यायेगु, सुख शान्ति प्राप्त यायेगु नापनापं निरोगी जुइगु, अध्ययनयात बांलाकेगु व लक्ष्यय् थ्यंकेगु चाहना दुपिं मिसा मिजं, ल्याय्म्ह ल्यासे, ज्याथजिथिपिं जक मस्त नं थुखेपाखे आकर्षित जुया वनाच्वंगु दुसा इमिगु निंतिं बिस्कं बिस्कं विशेष ध्यान शिविर नं संचालन जुया वयाच्वंगु दु ।

विपश्यना ध्यान याइपिं साधकं मखुगु खँ मल्हायेगु, प्राणी हिंसा मयायेगु, खुया मकायेगु, बम्हचर्या पालना यायेगु व नशा लगे जुइगु पदार्थ सेवन मयायेगु थेंज्याःगु नियम पालना यायेमाः । थ्व नियम दुुने च्वनाः शिविया न्हापांगु स्वन्हु व बान्ति श्वासप्रश्वासय् थःगु ध्यान केन्द्रीत गुकथं यायेगु धइगु अभ्यास याकी । थुकियात ‘आनापाना सति’ ध्यान धाइ ।झिन्हुया शिविरय् गुन्हु तक नमवासे पूर्णरुपं मौन च्वनेमाःगु नियम दुसा झिन्हुया न्हिकुन्हु जक नवायेगु अनुमति बी । विपश्यना ध्यानय् च्वनेत नेपाःलिसें विश्वया गुगुं नं देशय् संचालन जुइगु शिविरय् शुल्क पुलेम्वाः । पुलांपिं साधकतय् निंतिं विशष्टि शिविरलिसें म्होतिं नीन्हुनिसें अप्वलय् ख्वीन्हु (निला) तकया शिविर संचालन जुइ ।

सम्बन्धित बुखँ

LEAVE YOUR COMMENTS