डेंगु पनेत येँय् वासः छ्वाकल
डेंगुपाखें आः तक गुलि प्रभावित धइगु सही तथ्यांक मदुनि
येँ – स्वनिगलय् डेंगु ल्वय् महामारीया रुपय् न्यना वनाच्वंगु लूगु दु । ल्वय् पनेगु निंतिं येँ महानगरपालिकां स्वय्मसेविका व स्थानीय जनता परिचालन यानाः जनचेतना थनेगु ज्या न्ह्याकूगु दुसा वडास्तरं नं थीथी ज्यात शुरु याःगु दु । १७ वडाया वडाध्यक्ष नवीन मानन्धरं कनादीकथं प्रभावित लागाय् कोरियन व्यापारिक संस्था कृपा फाउन्डेसनया ग्वाहालिं फगर मेशिन– पाखें कुँ छ्वाकेगु ज्या न्ह्याकूगु दु ।
विशेष यानाः खुसि सिथय् लाःगु व झाः दुगु थासय् कुँ छ्वाकेगु ज्या जुयाच्वंगु खँ वडाध्यक्ष मानन्धरं कनादीगु दु ।अथे हे वडाध्यक्ष मानन्धर स्वयम् नं थःगु हे खर्चं थःगु वडाय् अडोमस नांगु पत्तिं मन्याइगु वासः इनेगु ज्याय् न्ह्यचिलादीगु दु । वय्कलं म्हीगंनिसें वडावासीया छेँय् छेँय् वनाः उगु वासः इनादीगु खः ।
मानन्धरं कनादीकथं खुसिबुँ लागाय् जक ७२ म्ह डेंगुया बिरामी लुइधुंकूगु दुसा उकी मध्ये छम्ह सी नं धुंकूगु दु । तर येँ मनपाया प्रवक्ता ईश्वरमान डंगोलं धाःसा मनपा दुने आः तक च्याम्ह निसें झिम्हेसित जक डेंगु ल्वचं कःगु खँ कनादीगु दु । बिरामी जूपिं अप्वःगु खःसां उपिं सकलें डेंगु पोजिटिभ मखुसें ज्वर जक वःसां डेंगु धकाः अनुमान जक याःगु खँ वय्कलं कनादिल ।
स्वनिगःन्यंकंया थीथी अस्पताल–पाखें ८९ म्ह डेंगु ल्वगि बारे जानकारी वःगु खँ कँसें येँमनपाय् जक च्याम्हनिसे झिम्ह जक विरामी लूगु दावी नं वय्कलं यानादिल । प्रवक्ता डंगोलं खुसिबुँइ सीम्ह मनू नं डेंगुया कारणं मखुसें मेनेन्जाइटिस ल्वचं कयाः सीगु खँ कनादीगु दु ।
कोरियन कम्पनीं येँया थीथी प्रभावित लागाय् कुँ छ्वाकेगु ज्या यानाच्वंगु बारे थःपिंसं अध्ययन यानाच्वनागु खँ प्रवक्ता डंगोलं कनादिल । थ्व कुँ छ्वायकेगु ज्यां गुलि लिच्वः लाइगु खः धइगु स्पष्ट मजूनि धासें वय्कलं मेडिकल्ली प्रमाणित जुल धाःसा मनपां नं उकियात हे प्राथमिकता बियाः न्ह्याः वनेगु खँ नं वय्कलं कनादिल ।
प्रवक्ता डंगोलं कुँया लिच्वः बारे बांलाक थुइकाः जक उकिया बारे धाये फइगु खँ नं कनादिल । थ्वहे झ्वलय् कोरियन कम्पनीं धाःसा थःपिंसं छ्वाकाच्वनागु कुँपाखें डेंगु नियन्त्रण जुइगु दाबी याःगु दु ।
उगु कम्पनीया मार्केटिङ अफिसर शुक्रराज नेम्वाङं ‘नेपालभाषा टाइम्स’ लिसे खँ ल्हासें नेपालय् डेंगु खने दयेवं कम्पनीं कुँ छ्वयाकेगु मेशिन नेपालय् हःगु व कम्पनीया साहु लि साङ हुं दछिया निंतिं सितिकं सेवा बीगु खँ कनादिल । नेवाङं धयादी, ‘थ्व जिमिगु विजनेश प्रमोशन व नेपाःया सेवा यायेगु ई खः । वय्कलं दछिया दुने नेपालय् डेंगु नियन्त्रण मजू तले ध्यबा मकासे सेवा बीगु जानकारी नं बियादिल ।
LEAVE YOUR COMMENTS