मन्त्रिमण्डलयात पूर्णता बीगु सहमति

येँ – सत्ता गठबन्धनया शीर्ष नेतातय् दथुइ म्हिगः च्वंगु बैठकं थौं मन्त्रिपरिषद्यात पूर्णता बीगु सहमति जूगु दु । प्रधानमन्त्री शेरबहादुर देउवां मन्त्रालय बाँडफाँडया विषयय् खनेदुगु असन्तुष्टि व मन्त्रीतय् नां क्वःछीगु लागिं म्हिगः गठबन्धनया बैठक सःतादीगु खः ।

बालु्वाटारय् जूगु बैठकय् माओवादी केन्द्रया अध्यक्ष पुष्पकमल दाहाल, नेकपा (एस)या अध्यक्ष माधव नेपाल व जसपाया उपेन्द्र यादवं ब्वति काःगु खः । प्रधानमन्त्री देउवां म्हिगः हे मन्त्रीतय् नां बीत दलतय्त इनाप यानादीगु खःसां नं नेकपा एस व जसपां धाःसा पार्टी दुने सहलह यानाः जक नां बीगु खँ धाःगु दु । माओवादी केन्द्रं मन्त्री जुइपिनिगु नांधलः प्रमयात बीधुंकूगु दु । माओवादीपाखें शशी श्रेष्ठ, देवेन्द्र पौडेल, महेश्वर गहतराजयात मन्त्री बोधमाया यादवयात राज्यमन्त्री दयेकेगु प्रस्ताव याःगु दु ।

गठबन्धनया निर्णय कथं आः नेपाली कांग्रेसयात प्रधानमन्त्री सहित च्यागू मन्त्रालय, माओवादीयात खुगू, जसपा व नेकपा एसयात प्यंगू प्यंगू मन्त्रालय बीगु सहमति जूगु दु । थ्व स्वयां न्ह्यः नेकपा एसं मन्त्रालय बाँडफाँडयात कयाः असन्तुष्टि प्वका वयाच्वंगु् खः ।
प्रधानमन्त्री देउवां म्हिगः हे मन्त्रि– परिषदयात पूर्णत बीगु तयारी

यानादीगु खःसा जसपा व नेकपा एसया दुने मन्त्री जुइपिं आकांक्षी अप्वः दयेवं उकियात व्यवस्थापन यानाः जक थौं मन्त्री जुइपिनिगु नां बीगु सहमति जूगु खँ सूत्रं धाःगु दु ।

थ्वहे झ्वलय् नेकपा (एस) यात बागमति प्रदेश व प्रदेश नं. १ या मुख्यमन्त्री बीत गठबन्धनया दलत तयार जूगु खँ सीदुगु दु । प्रदेश १ य् राजेन्द्र राई व बागमति प्रदेशय् राजेन्द्र पाण्डे मुख्यमन्त्री दयेकेगु लागिं नेकपा (एसं) तयार यानातःगु दु ।