चित्तधर म्युजियम उलेज्या

येँ (नेपालभाषा टाइम्स)- थनया तुंछेँ गल्लिस्थित नेपालभाषा परिषद्या छेँय् स्थापना जूगु चित्तधर हृदय स्मृति संग्रहालय म्हिगः आकाझाकां नेपाः झाःम्ह भारतीय विदेश सचिव विक्रम मिश्री व नेपाःया शहरी विकास मन्त्रालयया सचिव मणिराम गेलालं उलेज्या यानादिल ।

निम्हेस्यां मंकाः कथं उलेज्या याये धुंकाः विदेश सचिव मिश्रीं म्युजियम निरीक्षण नं यानादीगु खः । ४ करोड ७९ लाख दांया लागतय् दयेकूगु थ्व छेँ पुनर्निर्माणया लागिं भारत सरकारं ग्वाहालि याःगु खः ।
परिषद्या छेँय् वय्कःपिंत नेपाल– भाषा परिषद्या नायः प्रा. सुवर्ण शाक्य, पुलांम्ह नायः फणीन्द्ररत्न वज्राचार्य लिसें मेपिं पदाधिकारीपिंसं लसकुस यानादीगु खः ।

परिषद्या छेँ व म्युजियम उलेज्या लिपा विदेश सचिव मिश्री उखें तुं जनबहालय् झायाः अन जुयाच्वंगु निर्माण नं स्वयादीगु खः । वय्कःयात अन निलकाजी शाक्यं देगःया निर्माण लिबाःगु खँय् जानकारी यानादीगु खः ।