राष्ट्रपतियात सर्वोच्चय् हाथ्या
येँ (नेपालभाषा टाइम्स)- राष्ट्र पति विद्या भण्डारीं नागरिकता विधेयक प्रमाणीकरण मयाःगु खँयात वय्कःयात कानुनी हाथ्या बीगु ज्या जूगु दु ।
संसदं निक्वः निक्वः तक पारित याना छ्वःगु नागरिकता विधेयकयात अन्तिम इलय् तक नं राष्ट्रपति भण्डारीं प्रमाणीकरण मयाःगु संविधानया उल्लंघन खः धासें कानून विषय कयाः अध्ययन यानाच्वंपिं छुं विद्यार्थीतय्सं वय्कःया विरुद्ध रिट दायर याःगु खः । उगु रिटयात कयाः थौं सुनुवाई जुइगु ज्याझ्वः दु ।
राष्ट्रपति भण्डारीं संविधानया धारा ११३ (४) कथं संवैधानिक दायित्व पूरा मयाःगु धासें राष्ट्रपति कार्यालयया नामय् परमादेश जारी यायेत माग यासें उगु रिट दायर याःगु खः ।
संविधानया धारा ११३ कथं संघीय संसदं छक्वः पारित याःगु विधेयकयात राष्ट्रपतिं पुनर्विचार या धकाः छक्वः लित छ्वये फइगु अधिकार दुसा वहे धाराया उपधारा ४ य् संसदं हानं पारित यानाः छ्वःगु विधेयकयात धाःसा राष्ट्रपतिं अनिवार्य रुपं प्रमाणीकरण यायेमाःगु व्यवस्था यानातःगु दु ।
राष्ट्रपतिं विधेयक प्रमाणीकरण मयाःगु खँयात कयाः अदालतय् कानुनी हाथ्या बी फइगु बिचाः म्हिगः थीथी कानूनविद्तय्सं प्वंका हःगु खः ।
सामान्यतया राष्ट्रपतिं याइगु छुं नं ज्याखँयात कयाः सर्वोच्च अदालतय् मुद्दा लाइ मखु धइगु मान्यता दु । तर थ्व स्वयां न्ह्यः शेरबहादुर देउवायात २४ घौया दुने प्रधानमन्त्री पदया शपथ ग्रहण याकि धकाः सर्वोच्च अदालतं जारी याःगु परमादेशय् ‘यदि राष्ट्रपतिं याइगु ज्या संविधानया बर्खिलाप जुल धाःसा उकियात कानुनी चुनौती बी फइगु’ उल्लेख यानातःगु खः । उगु खँयात राष्ट्रपतिया ज्या यदि संविधानया अःखः जुल धाःसा राष्ट्रपति विरुद्ध नं मुद्दा लाये फइगु अवस्था दु धकाः कानूनविद्तय्सं अबले व्याख्या याना हःगु खः ।
राष्ट्रपतिया पक्षय् एमाले
राष्ट्रपति विद्यादेवी भण्डारीया बचाउया लागिं वय्कःया दल नेकपा (एमाले) नं खुले जुयाः पिहां वःगु दु । म्हिगः एमाले ज्याकुथी जूगु छगू ज्याझ्वलय् न्ववासें एमाले अध्यक्ष केपी शर्मा ओलीं गठबन्धन सरकारं राष्ट्रपतिया अपमान याःगु धासें राष्ट्रपतिया पलाःया बचाउ यानादीगु खः । उगु हे ज्याझ्वलय् एमाले महासचिव शंकर पोखरेलं विदेशय् नेपाःया म्ह्याय्पिंत नागरिकता बीत न्हय्दँ तक पीका तइगु तर नेपालय् धाःसा विदेशी भौपिंत तुरुन्त हे नागरिकता बीगु व्यवस्था एसियाया छुं नं देशय् मदु धासें विधेयक प्रमाणीकरण मजूगु पाय्छि खः धकाः तर्क यानादीगु खः ।
प्रहरीया पुलांम्ह महानिरीक्षण सर्वेन्द्र खनालयात म्हिगः पार्टी प्रवेश याकेत जूगु ज्याझ्वलय् न्ववासें एमाले नेतातय्सं थ्व अभिव्यक्ति बियादीगु खः । प्रहरी सेवाय् खनालया प्रतिद्वन्द्वी रमेश खरेल नं थौंकन्हय् बिस्कं पार्टी चायेकाः राजनीतिइ हे दी ।
LEAVE YOUR COMMENTS