महानगरवासीयात निःशुल्क डायलासिस

येँ -जलस्येँया विरामीतय्त सरकारं निःशुल्क डायलासिस यायेगु व्यवस्था यानातःगु दु । उकिसनं येँ महानगरपालिकां येँ देय्या स्थायीवासीतय्त आः नेपाली सेनाया छाउनी अस्पतालय् नं निःशुल्क डायलासिसया व्यवस्था याइगु जूगु दु । उकिया निंतिं म्हिगः नेपाली सेनालिसे छगू सम्झौता जूगु दु ।

येँ मनपा व नेपाली सेना दथुइ म्हिगः जूगु सम्झौता कथं थ्व निःशुल्क सेवा येँ मनपाया स्थायी निवासीतय्त जक उपलब्ध जुइ । आःयात सेनायाके दुगु स्रोत साधन कथं न्हिं ९ निसें १२ म्हेसित थ्व सेवा बीगु जुइ । थ्वया दथुइ सेनायात माःगु उपकरण न्यायेत मनपां ३ करोड तका ग्वाहालि बी । थ्व ध्यबापाखें न्हूगु उपकरण वयेधुंकल कि न्हिं ३० म्हेसित जक सेवा बी फइगु खँ धाःगु दु ।

म्हिगः सेनाया जंगी अड्डाय् छगू ज्याझ्वःया दथुइ येँ मनपाया मेयर विद्यासुन्दर शाक्य व नेपाली सेनाया प्रधान सेनापति पूर्णचन्द्र थापां सम्झौतापत्रय् हस्ताक्षर यानादीगु खः । सम्झौतापत्रय् यानातःगु व्यवस्था कथं थ्व सुविधा कायेगु लागिं जलस्येँया विरामीं दकलय् न्हापां वडा कार्यालयय् वनाः थः अनया स्थायीवासी खः धकाः प्रमाणित याना हयेमाः । उकिया हे आधारय् मनपाया जनस्वास्थ्य विभागं विरामीयात निःशुल्क डायलासिस सेवाया लागिं छाउनीया वीरेन्द्र सैनिक अस्पतालयात सिफारिस याना छ्वइ ।

सम्झौता लिपा थःगु नुगःखँ तसें मेयर शाक्यं थ्व सेवापाखें महानगरया वासिन्दातय्त सुविधा चूलाइगु बिचाः तयादिल । अथे हे प्रधानसेनापति थापां थ्व सेवापाखें नागरिक व नेपाली सेनाया स्वापू क्वातुका यंकेत तिबः जुइगु बिचाः तयादिल ।