छत्रपाटी निःशुल्क चिकित्सालयया ६६ क्वःगु वार्षिकोत्सव हन
येँ (नेपालभाषा टाइम्स)- छत्रपाटी निःशुल्क चिकित्सालया खुइखुक्वःगु वार्षिकोत्सव वंगु बिहिवाः छगू ज्याझ्वःया दथुइ हन । ज्याझ्वःया दथुइ मू पाहाँ येँ महानगरपालिकाया प्रवक्ता व येँ मनपा १७ वडाया अध्यक्ष नवीन मानन्धरं चिकित्सालयया आजीवन संस्थापक अध्यक्ष मदुम्ह कम्पाउन्डर बद्रीमान मालीया झ्वाताः उलेज्या यानादीगु खः ।
चिकित्सालयया अध्यक्ष डा. मनोजमाान श्रेष्ठया सभापतित्वय् जूगु ज्याझ्वलय् न्ववानादिसें मू पाहाँ मानन्धरं चिकित्सालय् चायेकुसां निसें गरिब असहायपिंत सेवा याना वयाच्वंगु खँ न्ह्यथँसें थुकियात निरन्तरता बीगु निंतिं थःम्ह फक्व ग्वाहालि यायेगु बचं बियादिल । अथेहे सभापतिया थासं न्ववानादिसें डा. श्रेष्ठं चिकित्सालयया विकासया बारे खँ तयादिसें चिकित्सालयया विकासया निंतिं सकलें जानाः न्ह्याः वनेमाःगु खँ धयादिल ।
ज्याझ्वलय् चिकित्सालयय् २९ दँ, २५ दँ, २० दँ व १० दँ सेवा यानादीपिं चिकित्सक व कर्मचारीपिंत सम्मान नं याःगु खः । २९ दँ स्वयां अप्वः सेवा यानादीम्ह स्टोर इन्चार्ज नन्दबहादुर श्रेष्ठ, २५ दँ स्वयां अप्वः सेवा यानादीम्ह प्रशासन प्रमुख लीना शाक्य, मार्केटिङ सहायक अनिरुद्र श्रेष्ठ, सुरक्षा गार्ड कमलबहादुर खड्का, २० दँ स्वयां अप्वः सेवा यानादीम्ह दन्त रोग विशेषज्ञ डा. रेजिना प्रधान, १० दँ स्वयां अप्वः सेवा यानादीम्ह मिखा ल्वय् विशेषज्ञ डा. विणा श्रेष्ठ, हाडजोर्नी विशेषज्ञपिं डा. राजेन्द्रमान प्रधान व डा. अनुजराज विजुक्छे, एनेस्थेसिया विशेषज्ञ डा. सुजिता मानन्धर, प्रशासकीय अधिकृत मिनु जोशी, लेखा सहायक रिना पुजारी, कार्यालय सहायक सुमित्रा श्रेष्ठ, सुरक्षा गार्ड श्यामबहादुर सापकोटा व भुपु सुरक्षा गार्ड दलबहादुर कार्कीयात सम्मान याःगु खः । अथेहे कन्या मन्दिर उच्च मावियात नं निरन्तर ग्वाहालि याना वयाच्वंगुलिं कदरपत्र लःल्हाःगु खः ।
ज्याझ्वलय् उपाध्यक्ष कुमारदेव मानन्धरं लसकुस यानादीगु खःसा महासचिव राजेन्द्रप्रसाद मानन्धरं मदुम्ह कम्पान्डर बद्रीमान मालीया योगदान बारे कनादीगु खः ।
चिकित्सालय् २०७६ साल निसें आःतक १३०५० म्ह विरामीयात ६३ लाख ८३ हजार ७३१ तका बराबरया निःशुल्क स्वास्थ्य सेवा व ४९२ म्हेसित ३ लाख ८८ हजार ५०० तका बराबरया निःशुल्क वासः इनेधुंकूगु जानकारी नं बिउगु खः ।
LEAVE YOUR COMMENTS