सुरुङमार्ग सञ्चालनय्, उलेज्या न्ह्यः विरोध
येँ (नेपालभाषा टाइम्स) – नेपाःया न्हापांगु आधुनिक सुरुङमार्ग धयातःगु नागढुंगा–सिस्नेखोला सुरुङमार्गया म्हिगः निसें सञ्चालनय् वःगु दु ।
म्हिगः पूर्वाधार विकासमन्त्री सुनिल लम्साल, जापान अन्तर्राष्ट्रिय सहयोग नियोग (जाइका) या नायः तानाका अकिहिको लिसें नेपाःया निंतिं जापानी राजदूत माएदा तोरुं मंकाःकथं उलेज्या यायेधुंकाः सुरुङमार्ग संचालनय् वःगु खः । उलेज्या ज्याझ्वलय् न्ववासें जाइकाया नायः तानाकां नागढुंगा–सिस्नेखोला सुरुङमार्गयात नेपाःया यातायातया विकास यात्राया ऐतिहासिक लिसें रूपान्तरणकारी उपलब्धि जूगु खँ धयादीगु दु ।
अथेहे वय्कलं वय्कलं सुरुङ योजना, निर्माण, संचालन लिसें मर्मत सम्भारसम्बन्धी क्षमता अभिवृद्धिया निंतिं नेपाः व जापान दथुइ न्हूगु प्राविधिक ग्वाहालि परियोजना न्ह्याकागु जानकारी नं बियादिल । नकतिनि जक स्वीकृत उगु परियोजनां सुरुङ पूर्वाधार विकासय् निगू देय् दथुया मंकाः ज्यायात थप विस्तार याइगु विश्वास प्वंकादिल ।
सुरुङमार्ग संचालनय् वःसां न्हापांगु चरणय् अत्यावश्यक व आपतकालीन सवारी साधन जक चले याकेबीगु जूगु दु । आयोजनाया उपनिर्देशक सञ्जय पन्थीं आःयात एम्बुलेन्स, दमकल, नेपाल प्रहरीलिसें सुरक्षा निकायया आपतकालीन सवारी जक दुत छ्वइगु सुरुङमार्गय् चरणबद्ध रुपं मेगु गाडीत नं दुत छ्वयेगु धयादीगु दु ।
मेखे सुरुङमार्ग उलेज्या जुइ न्ह्यः स्थानीयतय्सं थीथी माग तयाः विरोध प्रदर्शन याःगु दु । नागढुंगा सुरुङमार्ग पीडित संघर्ष समितिया नेतृत्वय् जूगु प्रदर्शनय् सहभागीतय्सं आकाशे ताँ याकनं दयेकेमाःगु, सतकपेटी तबाला यायेमाःगु, आयोजनापाखें प्रभावितपिंत रोजगारी बीमाःगु, फ्लाइओभरया नां किसिपिडी फ्लाइओभर तयेमाःगु माग याःगु दु ।
थ्व सिबें न्ह्यः सरकारं वि.सं. २०८२ चैत २६ गते राजपत्रय् सुचं पिथनाः सुरुङमार्गय् छ्यलीगु सवारी साधनया निंतिं दस्तुर निर्धारण याःगु खः । राजपत्रकथं कार, भ्यान, पिकअप, ट्याक्टर, माइक्रोबस लिसें मेमेगु हलुका सवारी साधनया निंतिं येँय् दुहां वइबलय् ६५ तका व येँय्नं पिहां वनीबलय् ६० तका दस्तुर कायेगु क्वःछिनातःगु दु । मिनीबस लिसें मिनी ट्रकया निंतिं छसिकथं १२५ तका व ८० तका, बस लिसें सिंगल रियर एक्सल ट्रकया निंतिं २६० तका व २०० तका लिसें मल्टिएक्सल ट्रक लिसें भारी उपकरणया निंतिं येँय् दुहां वइबलय् ६०० तका व पिहां वनीबलय् २५० तका दस्तुर क्वःछिनातःगु दु ।
LEAVE YOUR COMMENTS