येँ क्षेत्र नं. १० य् गठबन्धन दलतय् धेंधेंबल्लाः

येँ – येँ क्षेत्र नं. १० या माओवादी उम्मेदवारतय्सं थौं तकया स्थिति स्वयाः नां लित काये फइगु खँ धाःगु दु । गठबन्धन दुने जूगु सहमति लागू जुल धाःसा थःपिंसं बियागु उम्मेदवारी लित कायेगु खँ माओवादी केन्द्र १० नम्बर क्षेत्रया छम्ह नेतां ‘नेपालभाषा टाइम्स’यात कनादिल ।

गठबन्धन दुने १० नं.या संघय् राजन केसी, प्रदेश (क) लय् माओवादी व (ख) लय् एकीकृत समाजवादीं उम्मेदवारी बीगु सहमति जूगु खःसां कांग्रेसं प्रदेशय् नं उम्मेदवारी बीवं माओवादीं नं उम्मेदवारी बिउगु खः ।

माओवादीपाखें संघया उम्मेदवार अंजना बिसंखें १० नम्बर क्षेत्रय् गठबन्धन दुने स्वच्छ प्रतिस्पर्धा जुइगु खँ धयादीगु दु । वय्कलं म्हिगः तक गठबन्धन दुने नां लितकायेगु बारे छुं खँ मजूसां आः थःपिं स्वच्छ प्रतिस्पर्धाय् वनेगु खँ धयादीगु दु ।

‘नेपालभाषा टाइम्स’ लिसे खँ ल्हासें वय्कलं आः नां लित कायेगु सवाल हे मदुगु व आः गठबन्धनय् दुथ्याःम्ह कांग्रेसया उम्मेदवार राजन केसी व थः दथुइ सहमति जू कथं स्वच्छ प्रतिस्पर्धा यायेगु जुइ धयादिल ।

वय्कलं धयादिल, ‘म्हिगः तक छुं नं कथंया न्हूगु खँ वःगु मदु, थौं छुं जुइगु अवस्था नं मदु । अथे जुयाः राजन केसी व जि दथुइ स्वच्छ प्रतिस्पर्धा यायेगु सहमति जुइधुंकूगु दु । उकिं जिपिं निम्ह दथुइ सहमति जुइधुंकाः मेगु छुं विकल्प मालेमाःगु अवस्था मदु ।’

येँ क्षेत्र नं. १० (क) लय् कांग्रेसया पुकार महर्जन व माओवादी केन्द्रया दिलीप महर्जनं उम्मेदवार बिउगु खःसा (ख) लय् एसया रमा आले व माओवादी केन्द्रया गणेशबहादुर कुँवरं उम्मेदवारी बिउगु दु ।