रेल चले याकेत जनकपुरय् प्रदर्शन

येँ – पुलांम्ह प्रधानमन्त्री लिसें एमालेया अध्यक्ष केपी ओली चितवनया नारायणी खुसिइ नौका विहार यानाच्वंगु इलय् जनकपुरय् धाःसा वय्कःया हे पालय् झुलुक्क हयाः हानं ग्यारिजय् दिके यंकूगु रेल सेवा याकनं शुरु याये माल धकाः प्रदर्शन जूगु दु ।

धनुषाया जनकनन्दनी गाउँपालिका स्थित खजुरीइ रेल सञ्चालनया माग यासें प्रदर्शन जूगु खः । प्रदर्शनकारीतय्सं जनकपुरय् आः जुइगु विवाह पञ्चमि न्ह्यः हे रेल सञ्चालन यायेमाःगु माग यानाच्वंगु दु । उगु पर्वया इलय् भारतया पर्यटक दुकायेगु लागिं रेल सेवाया यक्व योगदान दइ धासें उगु पर्वयात लाक्क रेल सेवा शुरु यायेमाःगु माग याःगु खः ।

नेपाःया जनकपुरंनिसें भारतया जय नगर तक न्ह्याइगु उगु न्हूगु रेल भारतं दयेकाः तयार याःसां नं नेपाःपाखे आवश्यक पूर्वाधार हे तयार मजूगु कारणं नेपाः तक हयाः हानं लित यंकूगु खः ।