धर्मोदय सभां प्रमयात नाप लात

येँ – धर्मोदय सभाया छगू प्रतिनिधिमण्डलं प्रधानमन्त्री केपी शर्मा ओलीयात नाप लाःगु दु । धर्मोदय सभाया नायः यज्ञमानपति वज्राचार्यया नेतृत्वय् वंगु प्रतिनिधिमण्डलं प्रम ओलीयात नाप लाःगु खः । थ्व हे वइगु चैत २२ निसें २५ गते तक लमजुङया बेशींसहरय् जुइगु झिंनिक्वःगु राष्ट्रिय बौद्ध सम्मेलनय् मूपाहांकथं ब्वति कयादीत इनाप यासें ब्वनापौ लःल्हायेगु ल्याखं उगु प्रतिनिधिमण्डलं प्रमयात नाप लाःगु खः ।

उगु इलय् धर्मोदय सभाया उपाध्यक्ष पद्मज्योतिं चैत २२ गतेनिसें न्ह्याइगु सम्मेलनया ज्याझ्वः धलः न्ह्यब्वयादीगु खःसा महासचिव सागरमान वज्राचार्यं सम्मेलनया खर्च सम्बन्धी लागत विवरण न्ह्यब्वयादीगु खः ।

उगु इलय् प्रम ओलीं सम्मेलनय् थः मूपाहां रुपय् उपस्थित जुइगु निंतिं फक्व कुतः यायेगु बचं बियादीगु धर्मोदय सभां जानकारी बिउगु दु । थ्व हे झ्वलय् झिंनिक्वःगु राष्ट्रिय बौद्ध सम्मेलन ताःलाकेगु निंतिं थौंकन्हय् धर्मोदय सभालिसें थीथी शाखापाखें आवश्यककथं तयारीया ज्या न्ह्याकाच्वंगु दु ।

सम्बन्धित बुखँ

LEAVE YOUR COMMENTS