ख्वपय् तःजिगु सांस्कृतिक ज्याझ्वःया तयारी

येँ – ख्वप मिडिया सर्कलया ग्वसालय् थ्व हे वइगु असार २ गते जुइगु सांस्कृतिक ज्याझ्वःया तयारी तीव्ररुपं जुयाच्वंगु जानकारी बिउगु दु । वंगु शनिवाः छगू मुँज्यां ज्याझ्वः ताःलाकेया निंतिं थीथीकथंया जिम्मेवारी नं लःल्हाःगु दु ।

जिम्मेवारीकथं सकलें कलाकार, संस्थाया दुजः व शुभचिन्तकपिंत उगु ज्याझ्वःया निंतिं टिकट वितरण यायेगु नापं जेठ २२ गते तःमधि त्वालय् नांजाःम्ह ख्यालिजुजु मदनकृष्ण श्रेष्ठया ‘महको म’ सफू मीगु व उकिया निंतिं च्वमियात अन हे ब्वनाः अन विक्री जूगु सफुलिइ च्वमिया हस्ताक्षर याकेगु ज्याझ्वः तयातःगु दु ।

अथे हे वइगु २७ गते सांस्कृतिक ज्याझ्वःया निंतिं नासः पुजा यायेगु व उकुन्हु हे छगू पत्रकार सम्मेलन यानाः ज्याझ्वःया बारे औपचारिक घोषणा यायेगु तयारी नं याःगु दु । उगु सांस्कृतिक ज्याझ्वलय् मदनकृष्णयात हनेगु ज्याझ्वः दु ।