राष्ट्रपतियात भाषा आयोगया प्रतिवेदन
येँ (नेपालभाषा टाइम्स)/भाषा आयोगं थःपिनि आर्थिक वर्ष २०८१/०८२ या प्रतिवेदन म्हीग राष्ट्रपति रामचन्द्र पौडेलयात लःल्हात । आयोगं दँय्दसं थःपिनि प्रतिवेदन तयार यानाः राष्ट्रप्रमुखया ल्याखं राष्ट्रपतियात लःल्हायेमाः ।
भाषा आयोगया अध्यक्ष डा. गोपाल ठाकुरं म्हीग शितल निवास वनाः राष्ट्रपति पौडेलयात उगु प्रतिवेदन लःल्हानादीगु खः ।
प्रतिवेदन लःल्हाना कायेगु झ्वलय् राष्ट्रपति पौडेलं थःगु जिल्ला तनहुँलय् देय्या थीथी भाषाया आदिकवि पिनिगु सालिक दयेकाः तयेगु योजना कथं ज्या जुयाच्वंगु धासें सालिक दयेकेगु निंतिं भाषा आयोगं ग्वाहालि यायेमाःगु धासें ग्वाहालि यायेत इनाप यानादीगु दु । उगु इलय् भाषा आयोगया दुजःपिं, कर्मचारी लिसें राष्ट्रपति कार्यालयया उच्चपदस्थ कर्मचारीतय्गु उपस्थिति दुगु खः ।
भाषा आयोगं याःगु सिफारिसया लिधंसाय् बागमति प्रदेशं नेपालभाषा व तामाङ भाषा अले गण्डकी प्रदेशं गुरुङ व मगः भाय्यात सरकारी ज्याखँया भाषा दयेकेगु कथं कानुन पारित यानाः लागू यायेधुंकूगु दु । आः १ नम्बर (कोशी) प्रदेशय् नं लिम्बु व मैथिली भाय्यात सरकारी ज्याखँया भाषा दयेकेगु कथं प्रदेशसभाय् विधेयक पेश जुइधुंकूगु दुसा उकियात कयाः आः छलफल जुयाच्वंगु दु ।
‘कोशी’ प्रदेशय् लिम्बु व मैथिली निगू भाय्यात सरकारी ज्याखँया भाषा दयेकेगु विधेयक वःगु खःसां अन राई समुदायया चामलिङ व बान्तवा लिसें थारु भाय्यात नं सरकारी ज्याखँया भाषा दयेकेमाः धकाः संशोधन प्रस्ताव दर्ता जूगु दु ।
LEAVE YOUR COMMENTS