
दाजुकिजा मिले मजुल धाःसा उमित दुनियाँ हेपे याइ । अले दाजुकिजा मिले जूसा छु जुइ ले ? शायद थुकियात कयाः छगू न्ह्यथनेबहःगु उदाहरण खः – भाजु बाबुराजा महर्जनया परिवार । दकलय् न्हापां बाबुराजा महर्जनयात म्हसीके– वय्कः खः नेपाःया हे छगू तःधंगु, प्रतिष्ठित, नांजाःगु हिरा पसः ‘क्लासिक डाइमण्ड’या थुवाः । अथेहे रियलस्टेटया ख्यलय् नं प्रतिष्ठित ‘क्लासिक टावर’या थुवाः । नेपाःलिसें अमेरिकाय् तकं प्रतिष्ठित हिरा व्यापारी, अले रियल स्टेट व्यवसायय् नं नांजाःम्ह बाबुराजाया म्हसीका पीन्यादँ न्ह्यः तक थथे मखु । उबलय्या म्हसीका खः– न्हियान्हिथं बुँज्या याना जुइम्ह छम्ह सामान्य किसान । अथेहे पीदँ न्ह्यःया परिचय खः छम्ह ‘म्यासेन्जर’ अर्थात ‘पिउन’ ।
थांै व हे ‘किसान’, व हे ‘म्यासेन्जर’ लखौं करोडौं तकाया व्यापार याइम्ह जूगु दु । थ्व हिउपाः गुकथं वल ले ? भाजु बाबुराजाया हे धापू न्यनेगु खःसा थ्व फुक्क दाजुकिजा छप्पँ–छधी जुयाः च्वनेफुगुलिं खः । वय्कःया निम्ह किजा दु– अमीर व समीर । अले जिचादाजु रमेश व जिलाजं कृष्णलाल । वय्कःपिं न्याम्हं हे जानाः नेपालय् हिराया व्यापार सुरु याःगु खः, थ्व हे व्यापारं कमे नं यानादिल, प्रतिष्ठित व्यावसायिक घराना नं जुल ।
थ्व सफलताया सूत्रधार खः– भाजु बाबुराजा । थः किजा व जिचादाजु, जिलाजंपिंत हिरा व्यवसायय् हयेगुया लिसें सकसितं छथासं तयाः व्यवसाय बल्लाकेगु ज्याया कमान्डर जुयाः धाये वा पाँचपाण्डवया युधिष्ठिर जुयाः धाये, यानादीम्ह वय्कः हे खः । गुकथं चूलात ले थ्व सफलता ? थ्व खँ न्यनेबलय् धाःसा फिल्मी बाखं थें जुइ ।
बाबुराजाया अबु बाबुकाजी महर्जन यल लुँखुसिया छम्ह सामान्य किसान । उबलय् वय्कलं बुँज्याया लिसें ताहाचःया बलरामभक्त माथेमाया छेँय् ज्या याइगु । छन्हु वय्कःयात गंल्वय् (टिबी) जुल । गंल्वय् जूगु सिइवं माथेमां वय्कःया उपचार नं याकेगु व ज्या नं याकःछ्वयेगु धकाः हंगकंगय् च्वनाच्वंम्ह थः पासा भारतीय हिरा व्यापारी विपिन चोक्सीयाथाय् छ्वयाबिल । अबुम्ह हंगकंग वंबलय् तक बाबुराजा धाःसा बुँज्या यानाः लंतंफंतं जुयाच्वंगु । आखः नं बांलाक मब्वं । अथे जूबलय् छन्हु माथेमां हे अबुम्हेसित काय थन च्वनाच्वन धाःसा स्यनी, हंगकंगय् हे सःति धाल । अबुम्हं बाबुराजायात हंगकंगय् सःतल । हंगकंगय् बाबुराजायात छम्ह भारतीय हिरा व्यापारीयाथाय् ‘म्यासेन्जर’या ज्या चूलात ।
‘सन् १९८५ य् जि हंगकंग वनागु । उबलय् जि अंग्रेजी ला छु खय् भाय् तकं बांलाक ल्हाये मसः । आखः नं बांलाक ब्वनातयागु मखु । अथे जूबलय् जितः तसकं थाकुल । उमिसं धाःगु जिं मथू, जिं धाःगु उमिसं मथू’ बाबुराजां थम्हं हंगकंगय् यानागु संघर्षया सुरुयात लुमंकुसें धयादी ।
दछि तक भाय् हे मसयेक मथुइक ज्या यात । थ्वया दथुइ बुलुहुं अंग्रेजी व हिन्दी भाय् सयेकल । उबलय् हिरा व्यापारीयाथाय् हिरा ग्रेडिंगया व कटिंगया निंतिं भारतं हे ‘एसोटर’त वइगु । हिरा पसलय् ज्या यायां वय्कःयात नं हिराया ज्या सयेकेगु मन जुल । अन वइपिं भारतीयतय्त थःत नं हिरा ग्रेडिंग यायेगु ज्या स्यनाबीत धाल । तर यक्वसिनं छंत स्यनाबिलकि ला जिमिगु ज्या हे दइमखुनि धकाः स्यनामबिउ ।
थ्व हे झ्वलय् बम्बईं नं निलेश नांया छम्ह न्हूम्ह ‘एसोटर’ वल । बाबुराजां वयात पासा दयेकल । लिपा तसकं सतिइवं बाबुराजां थःत हिरा ग्रेडिंग यायेगु ज्या स्यनाबीत इनाप यात । व मनू धाःसा नुगःछ्वःम्ह हे लानाच्वन । व स्यनाबीत ला तयार जुल, तर मेगु समस्या वल– साहु नं सिलकि ला निम्हेसितं ज्यां हे लिकयाछ्वइ । उबलय् बाबुराजां ज्या यानाच्वंगु हंगकंगया क्वीन्स रोडय् च्वंगु सागर कर्पोरेशनया साहु गिरिधर लाल जवेरी तसकं कडाम्ह लानाच्वन । अथे जूबलय् साहु मदइ–मदइबलय् पसलय् हे च्वनाः स्यनाबिइगु यात । घौछि निघौ स्यनां जक मगाइगु जुल । अथे जूबलय् व हे पासां छगू उपाय लुइकल, ‘जिं पसः तीबलय् छप्वः हिरा म्हिचाय् तयाहये । छं बहनी बहनी हिरा ल्ययेगु ‘प्राक्टिस’ या ।’
बाबुराजायात ला छु मानि, अगःचा मालां देगः लू थें जुल । व तुरुन्त हे तयार जुल । न्हिछि पसलय् ज्या याना वयेधुंकाः हाकनं चच्छि चच्छि हिरा ग्रेडिंग यायेगु प्राक्टिस यात । ‘उबलय् सकलें छखा हे छेँय् च्वनेगु । ११–१२ बजे मजुइकं साहुत द्यनी मखु । उपिं द्यनेधुंकाः तीजक वनाः प्राक्टिस यायेगु’ उबलय्या संघर्ष वय्कःयात आः नं लुमं,अले धयादिल, ‘उमेर यक्व मदुनिबलय् याकनं सयेकेफइगु जुयाच्वना, याये धकाः न्ह्यचिल धाःसा यक्व यायेफइगु जुयाच्वन । जिं नं याकनं हे ग्रेडिंग यायेगु सयेका ।’
छन्हु पसलय् व हे भारतीय एसोटरं साहुयात धाल, ‘बाबुराजां नं हिरा ग्रेडिंग यायेसः नि ।’
साहु अजू चाल । ‘का का.. छक्वः यानाः क्यँ सा’ साहुं छप्वः हिरा न्ह्यःने तयाः धाल । बाबुराजां तुरुन्त हिराप्वः फ्यनाः हिरा ग्रेडिंग यानाबिल । साहु झन् हे अजू चाल, लिसें लय् नं ताल । उबलय् निसें बाबुराजायात नं हिरा ग्रेडिंग यायेगु ज्या याकल ।
बाबुराजा हिरा ल्ययेगु बांलाक हे सल । थ्व बाबुराजाया निंतिं जक मखु, साहुया निंतिं नं लबः दुगु हे जुल । छाय्धाःसां हंगकंगय् हे च्वनाच्वंम्ह बाबुराजां बांलाक थ्व ज्या सःबलय् हिरा साहुयात बम्बई निसें खर्च यानाः मेपिं एसोटर हयेमाःगु आवश्यक मजुल । बाबुराजां नं इमान्दारिपूर्वक ज्या यानायंकल । अथे जूबलय् साहुं विश्वास नं यानाहल । बुलुहुं बाबुराजा उगु पसःया म्यानेजर धयाथें हे जूवल । साहुं नं वय्कलं धाःगु खँ न्यनीगु जुयाच्वन ।
थन च्वनाच्वंगु इलय् बाबुराजायात किजापिं नं थन हयाः ज्या याकेदःसा जिउ धयाथें जुल । उबलय् किजापिं, जिचादाजुया नं बांलाक ज्या मदु । अथे जूबलय् साहुयात धयाः दकलय् न्हापां जिचादाजु रमेश महर्जनयात हंगकंगय् सःतादिल । बाबुराजाया साहुया सिफारिशय् रमेशं हंगकंगया मेगु हे हिरा पसलय् ज्या यात । रमेश नं सामान्य किसान परिवारं हे वःम्ह । वयाके नं अज्याःगु छुं शीप दुगु ला मखु । वय्कलं नं अनं संघर्ष यानादिल, अले बुलुहुं हिराया ज्या सयेकादिल ।
हंगकंगय् संघर्ष यानाच्वंगु इलय् बाबुराजायात न्ह्याबलें हंगकंगय् च्वनाच्वने ला फइमखु, परिवार फुक्क नेपालय् हे दु । लिपा वनाः नेपालय् हे छुं यायेमाः धयागु मती वल । नेपालय् ज्या यायेगु खःसा जनशक्ति ला माल । अथे जूबलय् वय्कलं थः किजा अमीरयात नं हिराया ज्या स्यनेमाः धयागु मती तयादिल । थ्व पालय् वय्कलं अमीरयात तप्यंक हंगकंग सःतामदी । न्हापां बम्बइलय् हे ट्रेनिंग कायेके छ्वयादिल । ‘किजापिंसं नं जिं थें संघर्ष यायेम्वाःलेमा धयागु जिगु बिचाः । हंगकंगय् ज्या यायां जिं बम्बईया व्यापारीत नं भचा भचा म्हसीधुंकूगु । उकिया हे लबः कयाः अले साहुयात नं धयाः किजा अमीरयात बम्बइलय् ट्रेनिंग कायेके छ्वया’ वय्कलं धयादिल ।
अमीरं खुला तक बम्बइलय् तालिम कायेधुंकाः अन हे छगू पसलय् ज्या यात । तालिम कयातःम्ह जूगुलिं अमीरयात बम्बैलय् ज्या यायेत थाकु मजूल । व नं बम्बैया हिराबजाःया लकसय् बुलावन । अमीरया बम्बइलय् क्वातुक ज्या जुइवं मेम्ह किजा समीरयात नं बम्बइलय् सःतकेबिल ।
आः बाबुराजायाके प्यम्हेसिया टिम दत–जिचादाजु रमेश, किजापिं अमीर व समीर लिसें थः हे । हिरा गनं वइ, गुकथं मीगु धयागु ला उपिं बांलाक हे सिउपिं जुल । बाबुराजायात न्हापां निसें गुलि मेपिनिगु जक ज्या याना च्वनेगु, थःगु हे छुं याये दुसा जिउ धयाथें जुयाच्वंगु, छन्हु हंगकंगय् हे दुम्ह जिचादाजु रमेशलिसे सहलह यानादिल । कर्पिनिगु देशय् जक गुलि च्वनेगु, नेपालय् ज्या यायेमाः धयागु निम्हेसियां सहलह ला जुल, तर नेपालय् हिराया व्यापार जक जुइगु खः कि मखु धयागु खँय् अन्यौल जुल । उबलय् तक नेपालय् हिराया ज्या धयागु बांलाक जु हे मजूनि । हिरा न्याइपिं हे दइगु खः ला मखुला धयागु शंका । प्यम्हेस्यां ज्या त्वःताः नेपालय् ला वइ, तर ज्या असफल जुल धाःसा हाकनं सतकय् लाःवनी । अथे जूबलय् बाबुराजां हे मेगु उपाय लुइकादिल ।
‘आः झी प्यम्ह दु । प्यम्हेसिनं छक्वलं ज्या त्वःताः नेपालय् वनाः व्यापार याये धयां जिइ मखु । प्यम्हेसिनं पालंपाः स्वला स्वला बिदा कयाः नेपालय् वनेगु, अन ज्या सुरु यायेगु । दछि तकया दुने ज्या बांलात धाःसा मालंमाः थे बिचाः याये ।’
बाबुराजाया थ्व हे सुझाव कथं दकलय् न्हापां रमेश स्वलाया बिदा कयाः हंगकंगं नेपाः झाल । हिरा गनं हयेगु धयागु ला सिउ, तर हिरा न्याइपिं सु जुइ धयागु मसिउ । नेपाः वयाः रमेशं हिरा न्यायेफुपिं साहुत म्हसिइकाः म्हसिइकाः हिरा मिउ जुल । ‘धाथें उबलय् रमेशं तसकं तसकं मेहनत याःगु खः । उबलय् वयाके मोटरसाइकल छगः दु, व हे मोटरसाइकलय् च्वनाः उखेंथुखें ब्वाँय् जुया जुइगु । व अथे ब्वाँय् मजूगु जूसा जिमिगु व्यापार उबलय् हे छखे लायेधुंकूगु खइ’ बाबुराजां जिचादाजु रमेशं उबलय् याःगु मेहनतया कदरया यासें लुमंकादिल । उबलय् रमेशया स्वभावं नं तसकं ज्या वःगु खँ वय्कलं धयादी, ‘रमेश तसकं शान्त स्वभावयाम्ह । मुसुमुसु न्हिलाः ज्या याइ । ग्राहकतय्सं छुं धाःसां तंचाइ नं मखु । आः नं अज्याःगु हे स्वभाव दु । थज्याःगु स्वभावं मार्केटिंग यायेत तसकं ग्वाहालि जुल ।’
बिदा कयावःगु स्वलाया दुने रमेशं हिरा न्याइपिं छुं छुं ग्राहक दयेकल । थ्वयां लिपा अमीर बम्बइ नं नेपाः वल । अमीरं रमेशं दयेकाथकूपिं ग्राहकया लिसें मेपिं ग्राहक नं दयेकल । अमीर बम्बइ लिहां वनेवं समीर येँ वल । वय्कलं नं अथे हे यानाः हिरा मीगु सुरु यात । थथे यायां दछि बीत । ‘दछि ति लिपा छक्वः जिपिं छक्वलं हे २० लाखया हिरा मीत ताःलात । उबलय् साहु तेजानन्द याकःचां हे २० लाखया हिरा न्यानाबिल । उबलय् जिमित ताल आः नेपालय् नं हिराया बजाः दत’ बाबुराजां कनादिल ।
थ्वयां लिपा रमेशयात ज्या त्वःतके बिल । अले ग्वार्कोय् थःपिनिगु हे छेँय् शोरुम चायेकल– बीआर डाइमन्डस् । अर्थात बाबुराजा–रमेश डाइमन्ड । सन् १९९५ य् चायेकूगु थ्व पसलय् तिसा दयेकाः हे हिरा मीगु सुरु यात । तिसा दयेकाः हिरा मीत फुक्कं कथंया च्यानल मिले जुल । हिरा छ्वयाहयेत बाबुराजा हंगकंगय् दु, तिसा दयेकेत अमीर बम्बैलय् दु । अमीरं बम्बैया कालिगढत बांलाक म्हसिउगुलिं अनं हे तिसा दयेकाः छ्वयाहइगु । ‘माःमाःथाय् माःमाःकथं मनू दुबलय् अःपुल । जिमिगु ‘टिमवर्कं’ यक्व हे ग्वाहालि जुल । छुं नं ज्या यायेत ‘टिमवर्क’ तसकं महत्वपूर्ण’ वय्कलं धयादी ।
थ्व लिपा येँया प्युखाय् रमेश व बाबुराजाया नामं मेगु शोरुम ‘आरबी डाइमन्ड’ चायेकादिल । दाजुकिजा जक मखु जिचादाजु, जिलाजं सकलें छप्पँ जुयाः ज्या यानावंगुलिं वय्कःपिनि व्यवसाय च्वन्ह्याना वन । वय्कलं धयादी, ‘मेपिनि दाजुकिजा तकं मिले जुइमखु, जिपिं जिचादाजु, जिलाजं तकं मिलेचले जुयाः ज्या याना । ज्याय् जक मिले जुयागु मखु, उबलय् जिपिं छखा हे छेँय् च्वनाः ज्या सना ।’
थ्व सफलताया मेगु छगू कसि नेतृत्व नं खः । ‘नेतृत्व याइम्हेसिनं थःगु जक स्वार्थ स्वयेगु यायेमजिउ । जिं नं गुबलें थःगु जक स्वार्थ मस्वया, सकसियां भिं जुइकेगुया निंतिं सहलह यानाः ज्या याना, गुकिं जिपिं छप्पँ जुयाच्वनेफत’ वय्कलं थःपिनिगु सफलताया मेगु सूत्र कनादिल ।
थौंकन्हय् धाःसा वय्कःपिं अलग च्वनादीधुंकूगु दु । तर छुटे जूगु धाःसां ल्वापुख्यापु यानाः मखु, फुक्कं सहमतिं हे जूगु खः । ‘सकसियां मस्त तःधिकः जुयावल । मस्तय् बिचाः व मांअबुपिनि बिचाः छगू हे जुयाच्वनी मखु । लिपा समस्या वयेफु । अथे जूगुलिं सकलें सहलह हे यानाः थःथःपिनिगु ज्या छुटे याना’ वय्कलं अपाय्सकं मिले जुयाः ज्या यानाच्वंपिं थःपिं छुटे जुइमाःगु कारण कनादिल ।
बाबुराजा थौंकन्हय् रियल स्टेटया व्यवसायय् दी । तर वय्कःया जहान लुडी बिना धाःसा हिरा व्यवसायय् दु । हंगकंगय् च्वनाच्वंगु इलय् हे वय्कःया फिलिपिनो बिना लिसे मतिना जुयाः इहिपा जूगु खः । रियल स्टेटया व्यवसायय् नं न्ह्यथनेबहगु सफलता चूलाकादीम्ह बाबुराजां २०७१ सालय् हे १६७ गू अर्पाटमेन्ट दुगु ‘क्लासिक टावर’ धस्वाकादीधुंकूगु दु । थौंकन्हय् धापाखेलय् ३७ रोपनी जग्गाय् ८४ खा बंगला दुगु ‘क्लासिक भिल्ला’ दयेकेगु ज्या न्ह्याका च्वनादीगु दु । स्वदँ दुने पूवंकेगु आज्जु दुगु थ्व क्लासिक भिल्लाय् नं स्वीमिंग पुल निसें फुक्क कथंया सुविधा दइगु खँ वय्कलं धयादी ।
रमेश महर्जनं थौंकन्हय् आरबी डाइमन्ड संचालन यानाच्वनादीगु दु, अले किजा अमीरं पाकोय् च्वंगु क्लासिक डाइमन्ड । मेम्ह किजा समीर न्युयोर्कय् च्वंगु क्वीन्स डाइमन्ड व सानहुसेनय् च्वंगु क्लासिक डाइमन्डयात स्वयाच्वनादीगु दु । अथे हे जिलाजं कृष्णलाल महर्जनं यलया नत्वालय् च्वंगु क्लासिक जेम्स संचालन याना वयाच्वनादीगु दु ।
व्यवसायय् सफल जुल धायेवं तुं वय्कःपिंसं थःपिनिगु संस्कार, संस्कृति, धर्मयात ल्वःमंकादीगु मदु । थःपिनिगु संस्कार संस्कृतिया ज्याय् सक्रिय हे जुयाच्वनादीगु दु । ‘झीगु धर्म संस्कृति ल्यंकातयेत फुचाः कथं ग्वाहालि यानाच्वनागु दु । तर समाजसेवी धकाः सक्रिय रुपं धाःसा मवया । छम्ह व्यापारी नं समाजसेवी नं छक्वलं जुइफइमखु । व्यापारं आराम कायेधुंकाः जूसा जुइफइ’ वय्कलं धयादी ।
वय्कःया जिचादाजु रमेश थौंकन्हय् नेपाल संवत् राष्ट्रिय समारोह समिति ११४० या अध्यक्ष जुयादी । अथे हे किजा समीर अमेरिकाय् च्वनाः नं नेवाःतय् निंतिं सक्रिय जक मखु थौंकन्हय् ला हलिं नेवाः दबूया उपाध्यक्ष नं खः ।
LEAVE YOUR COMMENTS