राजेन्द्र स्थापितलिसें स्वम्ह पत्रकार व छगू संचार संस्थायात सिरपाः

येँ – जनआस्था वाःपौया प्रवन्ध सम्पादक वरिष्ठ पत्रकार राजेन्द्र स्थापित ज्ञानज्योति लक्ष्मीप्रभा सिरपां सम्मानित जुयादीगु दु । वय्कःया लिसें स्वम्ह पत्रकार व छगू सञ्चार गृह नं सम्मानित जूगु दु ।
नेवाः पत्रकार राष्ट्रिय दबूया च्याक्वःगु साधारण सभाया झ्वलय् वय्कःपिंत थ्व सम्मान लःल्हाःगु खः । वरिष्ठ पत्रकार स्थापितयात २० हजार तकाया थ्व सिरपाः लःल्हाःगु खः । अथेहे नागरिक न्हिपौया पत्रकार वृmष्ण किसीयात १५ हजार तकासहित ज्ञानदेवी मणिरत्न स्थापित स्मृति पत्रकारिता पुरस्कार, फोटो पत्रकार रेखा शाक्ययात १० हजार तकासहित बाबुराजा ज्यापु फोटो पत्रकारिता पुरस्कार व बुद्ध धर्मया प्रचार प्रसारय् योगदान बिया वयाच्वंगु बोधि टेलिभिजनयात १२ हजार तकाया भिक्षु कुमार काश्यप स्मृति पत्रकारिता पुरस्कार लःल्हाःगु खः । अथेहे नेपाल सरकारया न्यूनतम पारिश्रमिक निर्धारण समितिया दुजलय् मनोनित जुयादीम्ह नेवाः पत्रकार ऋषिकेश श्रेष्ठयात नं सम्मान याःगु खः ।

ज्याझ्वलय् उत्तर व दक्षिण निगुलिं मोहडां सगरमाथाया सफल आरोहण यानादीम्ह न्हापांम्ह मिसा पत्रकार कल्पना महर्जनयात नं सम्मान याःगु खः । सम्मानित सकसितं मध्यपुर थिमि नगरपालिकाया मेयर मदन सुन्दर श्रेष्ठं दोसल्लां न्ययेकादीगु खःसा वागमती प्रदेशया सांसद राजेश शाक्यं सम्मान पत्र लःल्हाना दीगु खः । अथेहे पुरस्कारया दातापिंसं दां सिरपाः लःल्हानादीगु खः ।

ज्याझ्वलय् न्ववानादिसें मूपाहाँ सांसद शाक्यं नेवाः पत्रकारतय् राष्ट्रिय संगठन पत्रकार राष्ट्रिय दबूया थःगु हे भवन आःतकं मदुगुलिं दुःख ताः धयादिसें थःम्हं भवन दयेकेत पहल यायेगु खँ धयादिल । अथेहे मेम्ह मू पाहाँ मध्यपुर थिमि नगरपालिकाया मेयर मदन सुन्दर श्रेष्ठं पत्रकारतय् कल्याणया कोषय् थिमि नगरपालिकापाखें नं ग्वाहालि यायेगु प्रतिबद्धता प्वंकादिल ।

नेवाः पत्रकार राष्ट्रिय दबूया नायः सुरजवीर वज्रचार्यया सभापतित्वय् जूगु ज्याझ्वलय् पाहाँपिं प्रेस काउन्सिलया कार्यवाहक अध्यक्ष गोपाला बुढाथोकीं न्हापां मातृभाषी पत्रकार धर्मादित्य धर्माचार्ययात कयाः प्रेस काउन्सिलं दबूलिसे सहकार्य यानाः ज्याझ्वः यायेगु खँ धयादिल ।

ज्याझ्वलय् नेपाल आदिवासी जनजाति पत्रकार महासंघका अध्यक्ष दण्ड गुरुगं, नेपाल पत्रकार महासंघ प्रतिनिधि गोविन्द चौलागाईँ, राष्ट्रिय दलित पत्रकार संघया वरिष्ठ उपाध्यक्ष गोपाल बराइली, नेवाः देय दबूया नायः नरेश ताम्राकारपिंसं न्ववानादीगु खः ।

ज्याझ्वलय् मूपाहाँपिं शाक्य व श्रेष्ठं मंकाः पत्रकार दबूया ‘लुमन्ति पौ’ नं विमोचन यानादीगु खः ।

सभाया बन्द सत्रं मू छ्याञ्जे सुनिल महर्जनं न्ह्यब्वयादीगु वार्षिक कार्य प्रगति प्रतिवेदन व कोषाध्यक्ष सुरेन्द्रभक्त श्रेष्ठं न्ह्यब्वयादीगु आर्थिक प्रतिवेदन नं सर्वसम्मतं पारित याःगु खः ।

सम्बन्धित बुखँ

LEAVE YOUR COMMENTS